Hafiz Hacıyev: “Dünya gücləri terroçuya “dur” deməkdənsə, onu silahlandırır”

“Erməni terrorçuları Azərbaycan xalqına qarşı tarixin bütün dönəmlərində genosid törədib. Erməni terroru bu gün Gəncə şəhərində törədilir, bundan əvvəl bu vəhşiliyi Xocalıda, eləcə də öz dədə-baba yurdlarını – İrəvanı, Göyçəni, Zəngəzuru tərk etməyə məcbur edilən 20 milyonluq azərbaycanlının həyatında müşahidə etdik. Dünya erməni faşizminin apardığı bu çirkin siyasəti çox gözəl bilir. Amma ermənilərə “bu genosidə son qoy, dur” demirlər. Beynəlxalq ictimaiyyət yenə də lal, kardır”.

Bunu Versus.az-a Ermənistan silahlı qüvvələrinin Azərbaycanda törətdiyi terror aktına beynəlxalq münasibətin laqeydliyi və hansı reaksiyaları verəcəyi ilə bağlı açıqlamasında Müasir Müsavat Partiyasının (MMP) sədri Hafiz Hacıyev deyib.

Partiya sədri artıq başqa bir zamanın gəldiyini və Azərbaycan xalqının başda Ali Baş Komandan olmaqla erməni zülmünə, terroruna dözmək fikrində olmadığını deyib:

“Ali Baş Komandan dəfələrlə bu barədə qəti fikirlərini bildirib.  Bu gün də Azərbaycanın haqq səsini eşitməyən, terrora dur deməyən dövlətlər kar, kordurlar. Erməni faşistlərinin Azərbaycan torpaqlarından çıxarılmasına heç bir cəhd göstərmirlər. Buna baxmayaraq Ali Baş Komandanın iradəsi altında düşmənlərimizin susdurulması, geri çəkilməsi artıq göz önündədir. Bir neçə rayonumuz işğalçılardan azad edilib. Biz burda yenə də ATƏT-in Minsk Qrupu dövlətlərinin fəaliyyətini görə bilmirik. Bu gün Azərbaycan Ordusu öz torpaqlarını işğaldan azad etmək üçün səngərdə vuruşur, amma Ermənistan xaincəsinə mülki əhalini yatdığı yerdə raket atəşi ilə öldürür.  Düşmən mülki əhalini Gəncədə, Tərtərdə, Mingəçevirdə, Ağcəbədidə, Beyləqanda atəşə tutur. Bu, dünyada qəbul olunmayan vəhşilik, qəbul olunmayan bir haldır, cinayətdir. Ona görə də biz erməni faşistlərini torpaqlarımızdan qovmaq üçün bütün vasitələrə əl atmalıyıq. Bu gün Azərbaycan xalqı birdir, dövlət başçısının ətrafında çox sıx birləşib. Buna görə də Ermənistan hakimiyyəti böyük narahatçılıq keçirir və yalanlar danışır”.

H.Hacıyev belə bir vəziyyətdə beynəlxalq təşkilatların bizim problemə çarə tapacaqlarına inanmadığını deyib:

“Bu gün Ermənistanın dövlət büdcəsi özünü dolandırmağa çatmadığı halda bu qədər silahların alınmasında pulları hardan alırlar? Görünür ki, faşist Ermənistana öz terror əməlini genişləndirməsi üçün kimlərsə dəstək verir. Ermənistana o silahlar hardan gəlir. Kimdir bunları təmin edən?!. Biz bunları araşdırmalıyıq. Başı işləməyən Paşinyan erməni xalqını da qırdırmaq istəyir. Görür ki, Azərbaycan ordusu ilə bacarmayacaq, dinc əhalini atəşə tutur. Mülki əhali arasında uşaqlar, yaşlı insanlar, qadınlar öldürülür. Buna dözmək mümkün deyil. Təəssüf edirəm ki, Gəncəyə gələn beynəlxalq diplomatik nümayəndələr elə bil kinoya baxmağa gəlirlər. Belə olmasaydı, bu vəhşiliyi törədənlərə hər hansı bir təzyiq göstərərdilər. Mən özüm də dözə bilmirəm. Axı bizim heç kəsin torpağnda gözümüz yoxdur. Biz torpaqlarımzı azad etmək istəyirik. Ordumuz, Xalq, Ali Başkomandanın ətrafında sıx birləşərək axıra qədər gedəcəyik. Artıq bilməliyik ki, bu gün kimlər bizim yanımızda dayanıb”.

MMP sədri bildirib ki, Ordumuz öz üzərinə düşən missiyanı rəşadətlə həyata keçirir. Amma dünyaya demokratiya, azadlıq, haqq-ədalət dərsi keçən beynəlxalq təşkilatın məsələyə ikilistandartlı yanaşması ağlasığmazdır.

MMP sədri hesab edir ki, belə bir şəraitdə diplomatiyamız məhz beynəlxalq təşkilatların özünü haqqa dəvət etmək üçün xeyli çaba sərf etməlidir:

“Bu yöndə ciddi işlər görülür. Biz partiyalar olaraq bir çox beynəlxalq təşkilatlara müraciət eləmişik. Eləcə də dövlət, rəsmilər bu barədə dünya ictimaiyyətinə müraciət edirlər. Gəncədə 10 oktyabr erməni terrorundan sonra Azərbaycandakı xarici ölkələrin səfirlərini hadisə yerinə dəvət etdilər. Beynəlxalq ictimaiyyət öz gözləri ilə gördü. Amma nə edəsən ki, Ermənistana qarşı hər hansı sanksiya, təsir göstərən hərəkətlər, bəyanatlar verilmədi. Axı biz nə etməliyik ki, beynəlxalq təşkilatlar haqqı görsünlər. Biz buna təəssüf edirik. Dünya gücləri terroçuya “dur”- deməkdənsə, onu silahlandırır.  Niyə BMT susub, niyə 4 qətnaməsinin yerinə yetirilməsini tələb etmir?! İnanıram ki, bizim bayrağımız Şuşada, Xankəndində dalğalanacaq. Ona görə də erməni xalqı da bunu düşünməlidir, artıq öz övladlarını başqasının torpağına göndərib ölməsinə imkan verməməlidir”.

H.Hacıyev bildirib ki, ATƏT Minsk Qrupu bu dəfə Ermənistanın mülki əhalini qətlə yetirməsi faktı ilə bağlı işğalçıya qarşı sərt mövqeyini bildirməli və konkret addımlar atmalıdır:

“Əgər bu baş verməsə, nəhayət Azərbaycanın ATƏT-in Minsk Qrupuna qarşı mövqeyi daha sərt olmalıdır. ATƏT-in Minsk Qrupuna inanmamışam. Dəfələrlə demişəm ki, onlar ermənilərin bizim torpaqlarda məskunlaşmasına kömək edib. Ona görə də hesab edirəm ki, biz ATƏT Minsk Qrupundan qəti şəkildə imtina etməlyik. Biz Türkiyədən, dost dövlətlərdən kömək istəməliyik. Belə olmaz, bu qədər günahsız insanlarımız ölür”.

Partiya sədri bildirib ki, bu gün Azərbaycan ictimaiyyəti istər xaricdə, istərsə də daxildə informasiya müahribəsi sahəsində çox qətiyyətli mövqe ortaya qoyub:

“Bizim müraciətlər olub və xaricdə yaşayan soydaşlarımızla əlaqələrimiz güclənir. Xaricdə piketlər, mitinqlər keçirilir. Amma elə bil dünya dövlətləri eşitmir. Elə bil Ermənistanın terrorundan xəbərləri yoxdur. Hələ də beynəlxalq aləmdən, güc dövlətlərindən Ermənistana qarşı təpki yoxdur. Biz bilmirdik ki, insan haqlarından danışan dövlətlər kardır. Görünür ki, türkün türkdən başqa dostu yoxdur. Hər halda biz öz haqq işimizi qorumaq üçün ayaqdayıq və haqqımzı qoruyuruq. Və torpaqlarımzı işğaldan azad edəcəyik. Amma istərdim ki, xaricdə yaşayan diasporlarınız bir qədər də aktivliyi artırsınlar. TA ki, dünya eşidənə qədər sözümüzü deməliyik. Amma ən böyük inamımız Ordumuza, Ali Baş Komandana, xalqımızın birliyinədir”