Rusiyanın müxalif siyasətçisi Aleksey Navalnının həmkarları onun zəhərləndiyini iddia edirlər. Onların sözlərinə görə, sinir sistemini iflic edən maddənin izləri müxalifətçinin Tomsk şəhərində qaldığı mehmanxana otağındakı su şüşəsində aşkar edilib.
Navalnının sentyabrın 17-dəki instaqram bloqunda müxalifət liderinin xəstəliyi barədə xəbər çıxarkən tərəfdaşlarının hələ Tomskdakı Hander mehmanxanasında olduqları bildirilib.
Azad Demokratlar Partiyasının sədri, təhlükəsizlik məsələləri üzrə ekspert Sülhəddin Əkbərin “Yeni Müsavat”a bildirdiyinə görə, Rusiya zaman baxımdan gərgin bir dövrə qədəm qoyur.
Onun fikrincə, gələn ildən bunu daha aydın hiss edəcəyik: “Xabarovsk etirazları ilk siqnal idi. Belarus isə daha ciddi siqnal oldu. Xabarovsk Rusiyanın uzaq Şərqində, Belarus isə uzaq Qərbində idi. Bunun özü bir eyhamdır.
Onsuz da dünyada gedən geopolitik qarşıdurmalar və yeni dünya nizamı həlledici mərhələyə daxil olub və Rusiya bu prosesin içindədir.
Eyni zamanda pandemiya və neftin qiymətinin kəskin düşməsi gedişatı sürətləndirib.
Ona görə Rusiyanın siyasi rəhbərliyi tələm-tələsik referendumu keçirməklə yeni fırtınaya hazırlaşmaqdadır.
Kreml öz maraqları baxımdan sabitliyi qorumaq üçün müxalif fikirli insanları da neytrallaşdırır, nəzarətə götürür. Onlardan biri də Navalnıdır”.
S.Əkbər hesab edir ki, Navalnı iqtidara sanballı materiallarla, əyani təsir vasitələri ilə hücum edirdi: “Onun protest kütləyə rəhbərlik edəcək potensialını nəzərə alsaq, sui-qəsd versiyası məntiqlidir”.
Politoloq Navalnının zəhərlənməsindən sonra Rusiya hakimiyyətinə sanksiyalar olacağını güman edir: “Kreml onun zəhərlənməsini şübhə altına aldıqdan sonra Fransada iki müstəqil laboratoriya da zəhəri təsdiqləyib.
Düşünürəm ki, ABŞ, Böyük Britaniya və Avropa Birliyi ciddi sanksiyalara başlayacaq və Putin də daxil ediləcək”.
Partiya sədri Rusiya hakimiyyətinin siyasi rəqiblərini niyə sui-qəsd yolları ilə sıradan çıxarmasına aydınlıq gətirdi:
“Söhbət mövcud hakimiyyətdən getmir. Putinin hakimiyyətinin ömrünə kimisi ilyarım, kimisi üç il vaxt verir.
Amma onun yerinə hazırlaşanlar öz ətrafında olan və xüsusi xidmət orqanlarında rəhbərlik etmiş şəxslərdir.
Rus mətbuatında və sosial mediada Rusiya Təhlükəsizlik Şurasının katibi Nikolay Patruşevin, Federal Təhlükəsizlik Xidmətinin adı keçir.
Bu mənada xüsusi xidmət orqanlarının işə qarışdığı sui-qəsd ola bilər. Bilirsiniz ki, kimyəvi zəhərlər kütləvi silahdır və bu da xüsusi xidmət orqanlarının əlində olur”.
