Aslan İsmayılovun Ramiz Mehdiyevə yazdığı məktublar, bağışladığı kitablara qoyduğu dərkənarlar əlimizdə! Bir adam mənsəb üçün nə dərəcədə yaltaqlıq edərmiş, ilahi! İndi də ağasını sadiq yaratıq kimi müdafiə edir!
Məsələn:
«Həqiqi filosof, dövlət quruculuğunu ölkədə hamıdan yaxşı bilən Ramiz Mehdiyevə, həqiqi hüquqi dövlət quruculuğu arzuları ilə vəkil Aslan İsmayılovdan». (Mehdiyevə bağışladığı “Sumqayıt – SSRİ-nin süqutunun başlanğıcı” adlı kitabına yazdığı dərkənar)
Siz Allah, Ramiz Mehdiyev həqiqi filosofdur? Yəqin ki, Aslan bu bir cümləni necə yazmaq, hansı ifadəni necə və nə üçün işlətmək üzərində çox düşünüb və hər birinin də mənası, özü də siyasi mənası var.
“Həqiqi filosof”, yəni Platon, Aristotel, Sokrat, Konfutsi, Mövlanə, Heydər Hüseyinov və nəhayət, Ramiz Mehdiyev onların sırasında. “Dövlət quruculuğunu hamıdan yaxşı” bilir? Bir daha düşün: hamıdan? Ay Aslan, bu nə düşüklük, bu nə yaltaqlıq, bu nə fantaziya?
****
Aslan İsmayılovun 2014-cü ildə Ramiz Ənvəroviçə yazdığı məktub isə oxuyan hər kəsi iyrəndirir. Sitatlara başlayaq: “Sizin fəaliyyətiniz mənim üçün çox maraqlı olub. Sizin hələ gənc yaşlarınızdan Azərbaycan Respublikası Kommunist Partiyası Mərkəzi Komitəsində təlimatçı işləyərkən keçirilən şahmat birinciliyində rəqibinizin olmadığından, qələbələrin çox asan başa gəldiyindən turniri başa çatdırmadan tərk etməyinizi də eşitmişəm. Sizin qloballaşan dünya, yeni texnologiyalarla, KİV-lərlə bağlı yazılarınızdan, yaşıdlarınızdan fərqli olaraq, daim mütaliə etdiyinizi, dünyada gedən prosesləri mütəmadi və diqqətlə izlədiyinizi görməmək mümkün deyil”…
Yalançının başına bir qara daş düşsün! Bu qədər də olmaz axı!
**
İndi bir buna baxın: Aslan yazır: “Ramiz müəllim, Sizin bütün yazılarınızı həmişə çox maraqla oxumuşam. Ancaq təxminən son 5 ildəki çıxışlarınız, yazılarınız məni az-çox həyat təcrübəsi olan, ölkədə baş verən ictimai siyasi proseslərlə yaxından maraqlanan bir vətəndaşı çaş-baş salıb. Xüsusilə, oktyabrın 25-də Azərbaycan Respublikasının Prezidenti yanında Dövlət İdarəçilik Akademiyasının 15 illik yubileyi münasibətilə akademiyanın elmi şurasının iclasındakı çıxışınız və bununla əlaqəli olan, şübhəsiz ki, Sizin də xəbərdar olduğunuz, Azərbaycan qəzetinin 30 oktyabr 2014-cü il sayında müxbir İxtiyar Hüseynlinin imzası ilə dərc olunmuş “Mənəviyyat manifesti” məqaləsi beynimi tamam qarışdırdı.
Sizin çıxışınız və məqalə çoxlu sayda sosioloji sorğu və statistik məlumatlarla zəngin olduğundan elmi, praktiki nöqteyi nəzərindən çox dəyərlidir. Sizin çıxışınız həqiqətən İxtiyar Hüseynli yazdığı kimi mənəviyyat manifestidir və tarixdə qalacaq. Bu tipli yazıları daim izləyən biri kimi deyirəm ki, bu günə qədər heç bir müxalifət, vətəndaş cəmiyyətinin nümayəndəsindən ölkədəki acınacaqlı vəziyyəti bu cür açıq təsvir edən ikinci yazı oxumamışam”.
Buyurun, gizli yox, açıq yaltaqlıq nümunəsini, aslan yox, tülkü taktikasını özünüz dəyərləndirin. Bu, həmin Aslan İsmayılovdur! Və hər zaman belə olub! Bizim arxivlərdə eşələnən, şüşə binada yaşayıb, üstümüzə daş atan Aslan. Onun “arxivini” azcana qurdalayanda, bütün zibilləri ortaya çıxır! Üzdə bir cür, özəl məktublarında başqa cür olan Aslan İsmayılov!
****
Aslan İsmayılovun Ramiz Ənvəroviçə 2014-cü ildə yazdığı məktubdan daha bir sitat: “Ramiz müəllim, Siz həqiqətən elm sahəsində çalışmış, həqiqi alimsiniz və elmin millətin, dövlətin inkişafındakı rolunu məni kimilərdən qat-qat yaxşı bilirsiniz”…
Hansı insan özünü bu qədər alçaldar? Görün bu Aslan Ramiz Dayısının harasına qədər əyilir! Ən əsası da, onun yazdıqları düzdürmü?
Daha sonra isə məqsədini açır və bunca rəzilliyin, yaltaqlığının səbəbini açıqlayır:
“Özümlə bağlı bildirirəm. Mən dövlətimin yanındayam və ölənə qədər də olacam. Sizin yazılarınızın yanında olduğum kimi hakimiyyətin də yanında, ölkəm üçün faydalı olmaq istəyirəm”.
Bu da belə oldumu? Aslan Ramiz müəllimə yaltaqlanıb, vəzifə istəyirmiş!
*****
Məktubun növbəti qismində isə o, müxalifətə qarşı işverənliyə keçir: “Ramiz müəllim, mən də Sizin kimi bu günki müxalifətdən çox narazıyam və hesab edirəm ki, bu günki durumumuzda onların da xüsusi əməyi var”.
Di, ha!!! Gö…zə girənlik bu olsa, gərək! Aslan İsmayılov indi sosial şəbəkə vasitəsi ilə özündən qəhrəman düzəldir. Lakin bu qəhrəmanın “yırtığı” var və bütün havası yavaş -yavaş çıxır.
****
Aslan İsmayılovdan daha bir yaltaqlıq zirvəsi. Düşük vəkil Ramiz Ənvəroviçə daha sonra yazır: “Şəxsiyyətlərdən söhbət düşmüşkən yenə təkrar edirəm, Sizin kimi bir insanın şəxsiyyətin tarixdə rolunu, xüsusilə islam dünyasında, bilməməsi mümkün deyil. İmkanınız olanda hakimiyyətin ən yüksək (???)səviyyəsində təmsil olunanların şəxsi keyfiyyətlərinə nəzər yetirsəniz yaxşı olar”.
Ay səni xatakar! Kimi işarə verirsən, gerizəkalı? Utanmadınmı, bunları yazmağa?
Busan da! Mahiyyətin budur!
Ən sonda Aslan İsmayılov Ramiz ƏNVƏROVİÇƏ çox provokasion, lakin bu gün üçün aktual təklif də verir, onu iqtidara qarşı müxalifətə keçməyə səsləyir: Sitat: “… Həqiqətən ölkədə köklü dəyişiklik etmək istəyirsinizsə, istefa verin və nüfuzunuzdan, təcrübənizdən istifadə edib hakimiyyəti daha sərt və mütəmadi tənqid etməklə müxalifətə başçılıq edin ki, bizi inqilablar hədəfə almasınlar”.
Belə!!! Bu təklif indi daha çox aktualdır və görünən də budur ki, Aslan İsmayılov Ramiz MEHDİYEVİ yenə qızışdırır, onu iqtidara qarşı açıq müxalifətə çağırır. Əlindəki sosial media imkanlarından da Ramiz Ənvəroviçin müdafiəsi, onun açıqlamalarının yayılması məqsədi ilə istifadə edir.
Nədə olmasa, ikisi də eyni mərkəzə bağlıdır!
Mərkəziniz yansın!
Rauf Arifoğlu,
Əməkdar jurnalist, “Yeni Müsavat” Media Qrupunun rəhbəri
