Dünyada koronavirusa yoluxanların sayı 4 milyon 907 min 387 nəfərə çatıb. Virusdan ölənlərin sayı isə 320 min 397 nəfər olub.
Koronavirusla bağlı ölkələrdə son vəziyyət isə aşağıdakı kimidir:
ABŞ. Artıq uzun müddətdir ki, ABŞ koronavirusa yoluxmaya görə sırada liderdir. Son statistikaya görə, ölkədə 1 milyon 550 min 539 nəfər koronavirusa yoluxub, 91 min 985 nəfər isə virusdan dünyasını dəyişib.
Yoluxmaya görə, ikinci sırada Rusiya dayanıb. Son vaxtlar ölkədə koronavirusa yoluxanların sayında kəskin artım var – 299 min 941 nəfər. Ölənlərin sayı isə 2 min 837 nəfərə çatıb.
Üçüncü sırada İspaniyadır. Koronavirusun tüğyan etdiyi İspaniyada bu günə qədər 278 min 188 nəfər virusa yoluxub. Virusdan ölənlərin sayı da qorxunc həddədir – 27 min 709 nəfər.
Daha sonra sırada Braziliya gəlir. Ölkədə bu günə qədər 255 min 368 nəfər virusa yoluxub, 16 min 853 nəfər isə dünyasını dəyişib.
İngiltərə koronavirusa yoluxmaya görə, 246 min 406 nəfərlə 5-ci sırada olsa da, ölüm sayına görə ABŞ-dan sonra ikinci, Avropa ölkələri arasında isə 1-ci yerdədir – 34 min 796 nəfər.
Karantin rejimi sərtləşən İtaliyada da koronavirus bəlası səngimək bilmir. Bu günə qədər ölkədə 225 min 886 nəfər virusa yoluxub. Virusdan ölənlərin sayı da çoxdur – 32 min 7 nəfər. Beləliklə də virusdan ölüm sayına görə İtaliya Avropa ölkələri arasında İngiltərədən sonra ikinci sıradadır.
Qonşu Türkiyədə də koronavirusa yoluxma halı hər keçən gün artmaqdadır. Bu günə qədər ölkədə 150 min 593 nəfər virusa yoluxub ki, bununla da Türkiyə yoluxma sayına görə dünyada 9-cu yerdədir. Ölkədə virusdan ölənlərin sayı isə 4 min 171 nəfərə çatıb.
