“Bizim bu yollardan yay-qış keçmək olmurdu. Həm sürücülər əziyyət çəkirdi, həm məktəblilər üçün çətin olurdu.
İndi şükür ki, yollarımız asfaltlanır. Qabaqdan qış gəlir, problemlərimizin vaxtında həll olunması hamının işini asanlaşdırır”.
Bu sözləri Reportyor.info-nun əməkdaşı ilə söhbətində Abşeron rayonunun Xırdalan şəhər sakini Natiq Mürvətov məhəllədaxili yolların təmir olunması ilə bağlı bildirib.
Onun sözlərinə görə, Xırdalan şəhərində ara küçələr, məhəllədaxili yollar yenidən qurulur, sakinlərin problemləri həllini tapır.
N.Mürvətovun sözlərinə qoşulan Xırdalan sakini Fərid Əliyevin dediyinə görə, abadlıq-quruculuq işləri, yolların asfaltlanması davam edəcək.
Reportajı hazırlayarkən sakinlərdən öyrənirik ki, Abşeron Rayon İcra Hakimiyyəti tərəfindən həyata keçirilən bu yenidənqurma işləri daxili resurslar hesabına görülür.
Abşeronun icra başçısı İradə Gülməmmədovanın göstərişi əsasında Xırdalan daxili imkanlar hesabına abadlaşır.
Sakinlərin bildirdiyinə görə, yolların təmir edilməsi Xırdalanın ehtiyacı olan bütünməhəllədaxili massivlərini əhatə edəcək.
Müşahidələrimiz zamanı da şahid olduq ki, hazırda küçələrə texnika yeridilib, əsaslı yenidənqurma işləri gedir, yollar hamarlaşır, nəqliyyatın hərəkətində yaranan problemlər düzəlir.
Görülən işlər nəticəsində əvvəllər mövcud olmayan piyada səkiləri salınıb, yol kənarlarına qranit bordürlər düzülüb, ətraf ərazilər abadlaşdırılıb, yaşıllıq salınıb, gül kolları əkilib, müasir işıq dirəkləri quraşdırılıb.
Bununla yanaşı, hərəkətin intensivliyinin təmin olunmasında problemlər yarandan, tıxaclara səbəb olan dar yollar yenidən qurulub.
Bu işlərin nəticəsində mərkəzi küçələrin hərəkət hissəsi xeyli genişlənib və avtomobillərin hərəkətinə rahat və maneəsiz şərait yaradılıb.
Yolların təmiri ilə yanaşı, əhalinin istirahətinin səmərəli təşkili üçün yeni parklar salınıb, nümunəvi həyətlər də yaradılıb.
Məhəlləarası yolların asfaltlanması sakinlərin ürəyincədir. Onlar deyirlər ki, Abşeronun icra başçısı ilə görüşlərdə qaldırılan bütün məsələlər həllini tapır. Sakinlər bildirirlər ki, İ.Gülməmmədova yerindəcə tapşırıqlar verir və qısa zamanda icra olunur.
Çəkiliş zamanı öyrəndik ki, Xırdalan şəhərində nəqliyyatın rahat və maneəsiz hərəkətinin tənzimlənməsi, əhalinin gediş-gəlişinin asanlaşdırılması üçün əvvəllər mövcud olmayan küçə və prospektlərə, məhəllədaxili yollara asfalt vurulması işləri genişlənəcək.
Belə ki, uzunluğu 1,5 kilometr olan Nəsimi küçəsinə, həmçinin Nizami, Səməd Vurğun, Əlişir Nəvai, Həsən Əliyev, Mehdi Hüseynzadə küçələrinə artıq yeni asfalt örtüyü vurulub. Hazırda bu istiqamətdə işlər davam edir.
REPORTYOR.info
