Dövlət orqanlarına, media qurumlarına həqiqətə uyğun olmayan, əsassız və böhtan xarakterli müraciətlər ünvanlamaqla, Azərbaycan Avtomobil Yolları Dövlət Agentliyinin, agentliyin “8 №-li Xüsusi Təyinatlı Yol İstismarı” MMC-nin rəhbərliyinin ünvanına şər və yalanlar səsləndirərək AAYDA-nın işgüzar nüfuzuna xələl gətirdiyi üçün Əliyev Əliheydər Qabil oğlu ilə bağlı hüquq-mühafizə orqanlarına müraciət olunub.
AAYDA-dan Reportyor.info-ya verilən məlumata görə, müraciətlərdə vətəndaş “8 №-li Xüsusi Təyinatlı Yol İstismarı” MMC-nin sifarişi əsasında yol tikinti işlərinə tələb olunan tikinti-inşaat materiallarının alınması və daşınması işlərini həyata keçirdiyini və bunun müqabilində guya pulunun ödənilmədiyini, nəticədə ona 353.660 (üç yüz əlli üç min altı yüz altmış) manat məbləğində borcun yaranmasını bildirib.
Ə.Q.Əliyevin müraciətləri əsasında müxtəlif dövlət qurumları tərəfindən aparılmış araşdırmalar zamanı ərizələrdə qeyd olunanların həqiqətə uyğun olmaması, tikinti materiallarının daşınmasının dəyərinin tam ödənildiyi müyəyyən edilmiş və bu barədə Əliyev Əliheydər Qabil oğluna rəsmi cavablar verilib.
Bundan başqa, Əliyev Əliheydər Qabil oğlunun ərizəsi əsasında Bakı Şəhəri, Xətai Rayon Prokurorluğu tərəfindən həmin hallarla bağlı cinayət işi başlanılıb və aparılmış istintaq nəticəsində “8 №-li Xüsusi Təyinatlı Yol İstismarı” MMC-nin vəzifəli şəxslərinin əməllərində cinayət tərkibi mövcud olmadığı üçün 05 yanvar 2017-ci il tarixli qərarla işin icraatına xitam verilib.
Həmçinin Əliyev Əliheydər Qabil oğlu notarial qaydada təsdiq etdirdiyi 30 dekabr 2016-cı il tarixli ərizəsində AAYDA-nə (red. o zaman “Azəryolservis” ASC) və “8 №-li Xüsusi Təyinatlı Yol İstismarı” MMC-nin vəzifəli şəxslərinə heç bir pul iddiasının olmadığını və gələcəkdə də olmayacağını bildirib.
Bütün bunlara baxmayaraq, Əliyev Əliheydər Qabil oğlu sonradan Bakı Şəhəri Nərimanov Rayon Məhkəməsinə müraciət edərək, görülmüş işlərlə bağlı 353.660 (üç yüz əlli üç min altı yüz altmış) manat pulun, həmçinin qeyd olunan məbləğin vaxtında ödənilməməsi ilə əlaqədar ona vurulmuş zərərə görə 85000 (səksən beş min) manat, ümumilikdə 438660 (dörd yüz otuz səkkiz min altı yüz altmış) manat pulun tutularaq ona ödənilməsi barədə qətnamə qəbul edilməsini xahiş edib .
Məhkəmə prosesi zamanı Əliyev Əliheydər Qabil oğlu iddia tələbinin əsası kimi istinad etdiyi hallara dair sübütlar təqdim etməyib, həmin halların baş verməsinin sübuta yetirə bilməyib və məhkəmə araşdırması zamanı qeyd edilən hallar öz təsdiqini tapmayıb.
Qeyd edilənlər nəzərə alınaraq, Bakı Şəhəri Nərimanov Rayon Məhkəməsinin 26 sentyabr 2019-cu il tarixli, 2(005)-3429/2019 nömrəli qətnaməsi ilə iddiaçı Əliyev Əliheydər Qabil oğlunun mənə qarşı pul tələbinə dair iddia ərizəsi təmin edilməyib.
Bununla belə, Əliyev Əliheydər Qabil oğlu öz qanunsuz əməllərindən əl çəkməyək müxtəlif dövlət orqanlarına, media qurumlarına yenə də həqiqətə uyğun olmayan, əsassız və böhtan xarakterli müraciətlər ünvanlamaqda, müntəzəm olaraq Azərbaycan Avtomobil Yolları Dövlət Agentliyinin, həmçinin agentliyin “8 №-li Xüsusi Təyinatlı Yol İstismarı” MMC-nin rəhbərliyini şantaj etməkdə, hədə-qorxu gəlməkdə davam edir, şər və yalan dolu hərəkətləri ilə pul tələb edir. Bütün bunlar Azərbaycan Avtomobil Yolları Dövlət Agentliyinin işgüzar nüfuzuna xələl gətirdiyi üçün qeyd olunanlarla bağlı Əliyev Əliheydər Qabil oğlu barəsində qanunvericiliyə uyğun tədbir görülməsi üçün hüquq-mühafizə orqanlarına müraciət olunub.
