Azərbaycanın sabiq Xarici İqtisadi Əlaqələr naziri Qüdrət Quliyev hakimiyyət əleyhinə açıqlamalar verən oğlu Murad Quliyevlə bağlı bəyanat yayıb.
Murad Quliyevin “Facebook” səhifəsinə (Guliyev Mone) yerləşdirdiyi məlumatlardan belə görünür ki, o, hazırda ailəsilə birlikdə ABŞ-da (Los Anjeles) yaşayır. O, Azərbaycan hakimiyyəti əleyhinə sərt fikirlər paylaşır.
“Reportyor.info” sosial şəbəkələrdə aparılan müzakirələrə istinadla xəbər verir ki, sabiq nazirin oğlundan imtinasına əsas səbəb isə onun “Azadlıq” qəzetinin “Facebook” səhifəsində yayımlanan və geniş əks-səda doğuran müsahibəsi olub. M.Quliyev bu müsahibədə hakimiyyət əleyhinə çox kəskin fikirlər işlədib.
Qüdrət Quliyev oğlunun əleyhinə paylaşdığı bəyanatda bildirir: “Təcrübəsiz bir gəncin atasının adı və fəaliyyəti ilə spekulyasiya etməsi acınacaqlı haldır və mən oğlumun hərəkətlərini ictimai formada pisləmək və qınamaq zorunda qalmışam.
Onun mənim keçmiş həyatım, ictimai fəaliyyətim ilə bağlı KİV-də çıxışlarını səhv, yanlış və yersiz hərəkət sayıram.
Muradın, “keçmiş nazirin oğlunun” təcrübəsizliyindən istifadə edib siyasi dividentlər qazanmaq istəyənlərə, məni siyasi oyunlara qatmağa çalışanlara etirazımı bildirir və bu oyunların fərqində olduğumu bəyan edirəm!
Mən həyatım boyu demokratik fikirli bir vətəndaş olmuşam və fikir azadlığını cəmiyyətin ali norması saymışam. Mən 25 ildir ki, dövlət qulluğundan öz siyasi fikirlərimə görə və öz iradəmlə getmişəm. Amma dünyanı az-çox gördüyüm və bildiyim üçün, cərəyan edən proseslərdən hali olduğum üçün açıq siyasi fəaliyyətə qoşulmaqdan vaz keçmişəm.
Muradın sadəlövhlüyündən, özünü özünün də dərk etmədiyi oyunlara soxduğundan pərişanam və onun bilərəkdən və ya qanmadan hörmətsizlik etdiyi şəxslərdən, tanışlarımdan və dostlarımdan üzr istəyirəm”.
Atasının bu bəyanatına Murad Quliyevin münasibəti də sərt olub. “İndi də, məni atamla üz-üzə qoymaq istəyirlər. Bu gün oxuduğum xəbərə görə, sabiq Xarici İqtisadi Əlaqələr naziri olan atam, hökumətin basqısıyla oğluna qarşı açıqlama verib”, – deyə sabiq nazir oğlu baş verənlərə görə hakimiyyəti ittiham edib.
