Həbsdə olan “Kanal 13” internet televiziyasının rəhbəri Əziz Orucovun günlərdir səhhətində yaranan problemlər davam edir. 14 saylı cəzaçəkmə müəssisəsində cəzasını çəkən “Kanal 13” rəhbəri ilə bağlı aidiyyəti qurumlara edilən müraciətlər nəticə vermir.
Aprelin 3-də Ə.Orucovun həyat yoldaşı Lamiyə Orucova onunla görüşüb. “Yeni Müsavat”a açıqlamasında görüş barədə siyasi məhbusun həyat yoldaşı bunları deyib: “Əziz Orucovla görüşdüm. Səhhətində ciddi problemlər qalmaqdadır. Ürəyində ağrılar yaranıb, öskürək içində boğulur və deməsinə görə hərarəti düşmür. Hərəkət etməkdə çətinlik çəkir. Müalicə alsa da, yaxşılaşma hiss olunmur. Onun müalicə müəssisəsinə köçürülməsi üçün Penitensiar Xidmətə müraciət edəcəyik. Eyni zamanda onu da qeyd edim ki, Əziz Orucovun işi Ali Məhkəmədədir və kassasiya baxışını gözləyirik”.
“Kanal 13” rəhbərinin vəkili Cavad Cavadov da dünən onunla görüşüb. Mətbuata açıqlamasında vəkil Ə.Orucovun səhhətinin getdikcə ağırlaşdığını bildirib: “Əvvəlki görüşlərdən fərqli olaraq Əzizi yaxşı durumda görmədim. Ürəyindəki ağrılarlarla yanaşı, kəskin öskürəyi də var və hərarəti düşmür. Deməsinə görə, hərəkət etməkdə çətinlik çəkir. Müalicə alsa da, səhhətində irəliləyiş yoxdur. Səhhətindəki problemlər xarici görünüşünə baxanda da hiss olunurdu”.
Qeyd edək ki, Əziz Orucov 2017-ci il mayın 2-də həbs olunub. Ona əvvəlcə polisə müqavimət ittihamı ilə 30 sutka inzibati həbs cəzası verilsə də, azadlığa çıxmalı olduğu gün barəsində cinayət işi başlanıb və həbs-qətimkan tədbiri seçilib. Jurnalist “Qafqaz Media Araşdırmalar Mərkəzi” adlı təşkilatın fəaliyyətinə görə Cinayət Məcəlləsinin 192 (qanunsuz sahibkarlıq), 308-ci (vəzifə səlahiyyətlərindən sui-istifadə) maddələri ilə ittiham olunaraq, 6 il azadlıqdan məhrum edilib.(musavat.com)
