“Əvvəlcə Müsavat Partiyası 7 aprel tarixinə mitinq təyin etdiyini elan etdi, dünən isə Milli Şura 6 aprel tarixinə mitinq təyin etdiyini açıqladı”.
“Yeni Sabah” xəbər verir ki, bunu Müsavat Partiyası başqanının müavini Tofiq Yaqublu deyib. O, bildirib ki, bəziləri, Milli Şuranın niyə bir gün əvvələ mitinq təyin etməsi haqda ona suallar verir: “Əvvəla, mən həmişə demişəm ki, kütləvi aksiya keçirmək heç bir siyasi qüvvənin inhisarında ola bilməz və hamı kütləvi aksiya keçirməkdə sərbəstdir. Yalnız bir siyasi blokda olan və bundan doğan öhdəlikləri olan siyasi partiyaların bir-birindən xəbərsiz mitinq təyin etməsi suallar doğura bilər.
Yeri gəlmişkən, İctimai Palatanın əsasnaməsinə görə, bu quruma daxil olan partiyaların ayrı-ayrılıqda mitinq keçirmək hüququ var idi.
Milli Şura, hələ Novruz Bayramından və Müsavat Partiyasının 7 aprel tarixinə mitinq təyin etməməsindən əvvəl aprelin 6-da mitinq keçirmək haqqında razılığa gəlmişdi. MŞ-nın qaydalarına görə, mitinq elan edilən andan dərhal onun qızğın təbliğatına başlanılmalıdır. Əgər biz bu qərarı bayramdan əvvəl versəydik, onda bayram günlərində qızğın təbliğatla məşğul olmalı idik. Elə 30 mart tarixinə də məhz bu səbəbdən təyin edilmədi. Çünki bayramla əlaqədar bir həftəlik tətil olduğuna görə, bu halda da icra hakimiyyətinə müraciət bayramdan əvvəl göndərilməliydi.
19 yanvar mitinqindən sonra Milli Şura iki həftə aralığı ilə sistemli olaraq mitinq elan edib və rəsmi müraciət göndərib. Kimsə, düşünürsə ki, bayramla əlaqədar labüd fasilə də daxil olmaqla bu qədər uzun aradan sonra Milli Şuranın mitinq keçirmək planı olmayıb, səhv edir. Ölkənin iki ən güclü demokratik qüvvələrin dalbadal mitinq təyin etməsinin nəyi pisdir ki?
Təsəvvür edin ki, hər iki mitinqə icazə verildi, belə halda rejimə dalbadal iki tutarlı zərbənin vurulmasının nəyi pisdir? Bir də ki, bilə-bilə ki, elan edilmiş mitinqlərə icazə verilməsi ciddi sual altındadır, onda bu narahatlıq nəyə lazımdır”.
T. Yaqublu bildirib ki, indiki reallıqda onların heç birinə icazə verilməyəcəyi daha çox gözlənəndir: “Birinə icazə verərlərsə, hamı yığılıb həmin o birində iştirak edərik. Hər ikisinə icazə verilərsə, bayaq dediyim kimi, rejim bizdən dalbadal iki güclü zərbə alar. Praktika göstərir ki, hakimiyyət bazar günlərinə və “Məhsul” stadionundan kənara təyin edilmiş mitinqlərə icazə vermir. İllah da ki, yürüşlərə. Həm də bu səbəbə görə Milli Şura növbəti mitinqini ertələyə bilməzdi. Odur ki, dedi-qodulara fikir vermədən, heç nə olmamış kimi Milli Şuranın 6 və Müsavat Partiyasının 7 aprel mitinqlərinə hazırlaşın. Rejimin dəyişdirilməsi uğrunda səmimi mübarizə aparanlar, bu yolda səmimi mübarizə aparan siyasi qüvvələrin kütləvi etirazlar üçün yaratdığı imkanlara sevinməli və bu imkanlardan maksimum yararlanmağa çalışmalıdırlar. Əgər, bir demokratik siyasi qüvvə kütləvi aksiya haqqında qərarını elan etdikdən sonra, başqa bir demokratik qüvvə eyni günə, eyni saata paralel aksiya təyin etsəydi, bu haqda düşünmək olardı”.
