Azərbaycan prezidentinin şəhid ailələri ilə görüşdüyü gün xəbər yayıldı və rəsmi təsdiqləndi: “Qaçqınkom” sədri 180 minlik BMW alıb.
Komitə bu məlumata belə izahat verdi ki, köhnə xidməti avtomobili sabiq sədr özü ilə aparıb, qaytarmayıb. Ona görə Əli Həsənovdan xidməti maşını geri ala bilməyiblər, Rövşən Rzayevə təzəsi – 180 minlik maşın verilib. Əcəb işdir!
Anaxeber.info yazır ki, ötən gün bu iki məlumat sosial medianın baş gündəmini təşkil edirdi: dövlət başçısı şəhid ailələri ilə görüşür, “Qaçqınkom” sədri prezidentin məmurlara tövsiyə etdiyi “Naz Lifan” yox, 180 minlik BMW sürür.
R.Rzayev fikirləşib ki, Şuşanın icra başçısı Bayram Səfərovdan nəyi əskikdir, onun “Lincoln MKS” maşını varsa, mənim də 180 minlik BMW avtomobilim niyə olmasın?!
1 milyon köçkünü olan dövlətdə onların taleyinə, sosial qayğılarına cavadeh qurumun yeni sədri fantastik qiyməti olan maşın sürürsə, qaçqın daha nə gözləsin…
R.Rzayev komitə sədri vəzifəsinə gəldiyi vaxtdan kimsə intihara qalxır, kimsə haqsızlıqla üzləşir, kiminin hələ də evi yox, kimisi zirzəmidə yaşayır. Qısaca desək, Ə.Həsənova şükür etdirir.
Çünki Ə.Həsənov ən azından özü köçkünlüyün nə olduğunu bilirdi, bu insanları yaxşı tanıyırdı. Deputatlığı dövrdə Milli Məclisdə səsi gəlməyən, yalnız ABŞ-a sanksiya tətbiq eləmək kimi absurd təşəbbüsü ilə yaddaşlarda qalan R.Rzayevin “Qaçqınkom”a gəlişinin nəticələri göz qabağındadır: qaçqınların problemləri ilə bağlı köklü addımlar atmayıb, tez bir vaxtda 180 minlik maşına sahiblənib.
Axı köçkünü zillət içində yaşayan ölkədə “Qaçqınkom” sədri niyə oliqarx maşını ilə gəzməlidir? Prezidentin təklif etdiyi yerli istehsal maşını sürmək olmazmı?
R.Rzayev bir nümunə olmalıydı, torpağı düşmən tapdağında olan vətəndaşlara bahalı həyat tərzi ilə qıcıq verməməliydi. Üstəgəl, bu qədər vəsaitin xidməti maşına sərf edilməsi israfçılıdır.
Komitə sabiq sədr Ə.Həsənovdan qanuna müvafiq olaraq xidməti avtomobili geri tələb edə bilərdi. Ə.Həsənov bu komitədə yaratdığı korrupsiya bataqlığı ilə nəvəsi 200 min civarında qiyməti olan maşında gəzirdi.
Sonrası bəllidir. İndi yeni sədr də onun nəvəsindən geri qalmır, 180 minlik xidməti maşını var. Nə deyirik, o gün olsun Şuşada, Kəlbəcərdə, Qubadlıda sürsün!!!
Amma başqa seçimi də varıydı – prezidentin şəhid ailələri ilə görüşməsi kimi, R.Rzayev məcburi köçkünlərlə görüşüb onların dərd-sərini dinləyərdi, bununla gündəmə gələrdi.
Bu bahalı lüks avtomobildən istifadə edilməsi onun “islahatçı” imicini kölgə altına almış olmurmu? Axı islahat və israfçılıq sözləri zahirən bir-birinə oxşasalar da, mahiyyətcə tamamilə fərqli və bir yerə sığmayan anlayışlardır.
Xüsusilə də “Qaçqınkom” kimi missiyası bəlli bir qurumda dəbdəbə, komfort və lüks anlayışları öndə gələ bilərmi? Görəsən, hələ də bir xeyli hissəsi antisanitariyanın tüğyan etdiyi, adi məişət şəraitinin olmadığı yataqxanalarda ağır sosial vəziyyətdə yaşayan insanlarla işləyən bir qurumun rəhbəri az qala 200 min manat qiyməti olan maşına oturmağı özünə necə rəva bilir?
Bu avtomobili uzaqdan görən qaçqının ağlına gələn birinci söz “toxun acdan nə xəbəri” deyilmi? Görəsən, ümumiyyətlə “od qiymətinə” olan bu lüks maşının pəncərəsindən əyin-başı və daxmasındakı “var-dövləti” heç onun bir təkərinin qiyməti qədər olmayan qaçqın, həmin qaçqının dərd-səri necə görünür? Axı 180 minlik “BMW” “Qaçqınkom”un nəyinə, harasına yaraşır?
Bir sözlə, hamı bilir və “Qaçqınkom”a rəhbərlik edənlər də bilməmiş deyillər ki, bu qurum kefdən yox, əlacsızlıqdan yaradılıb – el-obasından, ev-eşiyindən didərgin düşənlərin dərdinə az da olsa əlac etmək üçün, kimlərəsə lüks həyat tərzi təmin etmək üçün yox…
“Qaçqınkom” sədri işində fərqlənmək, canfəşanlıq etmək, dəridən-qabıqdan çıxmaq niyyəti olmadığı görünür. Bu da şikayətlərin, narazıların artmasına gətirib çıxarır.
Belələrindən biri – Füzuli köçkünü Ramin Heydərov idi və bu günlərdə mediaya demişdi ki, gənc ailə başçısıdır, bir xəstə övladı var:
“Amma ailəmizə qarşı Rövşən Rzayev gələndən bir “səlib yürüşü” başlanıb. Bilmirəm bizdən nə istəyirlər. Qeydiyyatda olduğumuz yataqxanadan da çıxarıblar.
Səbəb də göstərmirlər. Dəfələrlə “Qaçqınkom”un işçisi İbrahim müəllimlə əlaqə yaratmaq istəsəm də, telefonlarıma cavab vermir. İndi tək ümidim intihar etməyə qalıb. Ailəmi də xəbərdar etmişəm”.
R.Heydərovun sözlərinə görə, R.Rzayevin qəbuluna düşə bilməsə, özünü “Qaçqınkom” qarşısında yandıracaq: “Çünki çarəsizəm, dövlət tərəfindən heç bir qayğı görməmişəm və Rövşən Rzayev gələndən bəri imtiyazlarımızı bir-bir itiririk”.
Bu yaxınlarda Səfərov Elşən Allahverdi oğlu Qubadlı rayonundan məcburi köçkün düşdüyünü, yeni mənzillə təmin ediləcəyini gözlədiyini bildirmişdi.
“Sən demə yeni mənzilə köçürülməyimizlə bağlı “Qaçqın və Məcburi Köçkünlərin işləri üzrə Dövlət Komitəsi”nin Binəqədi rayonu üzrə sektor müdiri Tağıyev İlqar Ağamalı oğluna yeni mənzilə köçürülmək üçün 5-10 min manat civarında rüşvət verilməli imiş.
Mən və valideynim ona gücümüz çatan 1000 manatı təklif etdikdə o, bizə bildirdi ki, “həmin məbləğ çox azdır, özünüzü boşuna əziyyətə salmayın”.
Faktlar göz deşir, Rövşən Rzayev isə salondan çıxmış qət təzə avtomobilin keyfini çıxarmaqdadır. Sağlığına qismət, o gün olsun – Xankəndinə, Cəbrayıla, Zəngilana sürüb getsin…
Anaxeber.info
Turan
