“Azərbaycan Prezidenti cənab İlham Əliyevlə Ermənistan Baş naziri Nikol Paşinyanın Şanxay Əməkdaşlıq Təşkilatının Sammiti çərçivəsində görüşü bir daha göstərir ki, Cənubi Qafqazda proseslər tək həmin ölkələrin maraqları, regional ölkələrin maraqları ilə deyil, həm də Şərqdən, xüsusilə Çindən gəlir”.
Bu fikirləri AZXEBER.COM-a açıqlamasında Milli Məclisin deputatı, Müdafiə, Təhlükəsizlik və Korrupsiya ilə mübarizə komitəsinin sədri Arzu Nağıyev Prezident İlham Əliyevin Çində Şanxay Əməkdaşlıq Təşkilatının Sammiti (ŞƏT) Çərçivəsində Ermənistan Baş naziri Nikol Paşinyanla görüşünə münasibət bildirərkən deyib.
Deputat qeyd edib ki, Çin də Cənubi Qafqazda sülhün bərqərar olmasının tərəfdarıdır:
“Çin də marağındadır ki, məhz tezliklə regionda, Cənubi Qafqazda sülh bərqərar olsun. İstər Avropa, istərsə də ABŞ çərçivəsində vasitəçilik oldu, burada aktivlik olsa da Çinin öz maraqları var. Çin həm dünya düzənində yeniliklə çıxış etmək istəyir, eyni zamanda özünün gələcəkdə nəqliyyat-logistika layihələrinin təhlükəsizliyinə təminat almaq üçün bu ərazidə də mütləq şəkildə sülhün bərqərar olmasını istəyir. Çin bunu artıq bir neçə dəfə göstərir və bir kəmər-bir yol təşəbbüsünün vacib hissəsi kimi Orta dəhlizin təm şəkildə təhlükəsizliyini istəyir və bura sərmayə yatırmaq fikrindədir. Bunun da əsas qarşısının alınmasında Ermənistan-Azərbaycan münasibətlərinin gərginliyi idi. İndi artıq bu sabitliyin bərqərar olmasını istəyirlər və istəyirlər bu sabitlikdən sonra öz prosesləri davam etdirsinlər. Çin balanslandırıcı siyasət aparır və Qərbin vasitəçilik məsələləri zəiflədikcə, Rusiya zəiflədikcə yeni güc mərkəzi kimi özünü göstərməyə çalışır”.
Arzu Nağıyev hesab edir ki, Çin Azərbaycan-Ermənistan münasibətlərinin normallaşmasında mühüm elementdir:
“Cənubi Qafqaz həm enerji resurslarının təhlükəsizliyi, həm terrorizmin, separatizmin qarşısını alması risklərinin çox qlobal şəkildə həllini ortaya qoya bilər. Çin tərəflərə təzyiq deyil, yumşaq bir güc göstərərək öz iqtisadi maraqları fonunda siyasi sabitliyi qorumağa çalışır və ciddi oyunçu kimi Birləşmiş Millətlər Təşkilatının Təhlikəsizlik Şurasının bir üzvü kimi çıxış edir. Bu da imkan verir ki, həm Azərbaycan, həm də Ermənistan öz siyasətini həyata keçirsin. Düşünürəm ki, münaqişənin həllinin və sülhün bərqərar olması, eyni zamanda sülh sazişinin imzalanması istiqamətində bu çox mühüm roldur”.
