Loqo
✕
GÜNDƏMSİYA
Ölkənin iki kütləvi informasiya vasitəsi – “Haqqin.az” saytı ilə “Azərbaycan Televiziya və Radio Verilişləri” QSC arasında qalmaqal yaşanıb.
SAVASH.MEDİA xəbər verir ki, “Haqqin.az” saytının rəhbəri Eynulla Fətullayev AzTV sədrinin özünü də, dissertasiyasını da “geydirmə” adlandırıb.
Baş redaktorun həmin postunu olduğu kimi təqdim edirik:
“Deməli, geydirmə AzTV-nin geydirmə sədrinin dissertasiyası da geydirmə imiş. Geydirmənin doktorluq dissertasiyası: “Azərbaycan diasporasının mətbuatı”. Ay səni geydirmə”.
Eynulla Fətullayev bununla da kifayətlənməyib və digər postunda lənət oxuyub: “Ümummilli lənət: Görüm sizi ömrünüzün sonuna kimi AzTV-yə baxasınız!”.
AzTV isə öz növbəsində “Haqqin.az” saytının əməkdaşlarını “cahil” adlandırıb. AzTV Feysbuk səhifəsində paylaşım edərək, sözügedəm saytı haqsızlıqda və reketçilikdə günahlandırıb. Səbəb “haqqin.az” saytının “Azərbaycan televiziyası ailə zorakılığını təbliğ edir” adlı məqaləsi olub. Telekanal iddia edib ki, nə qədər çalışsalar da, AzTV-nin hansı zorakılığı, nə zaman və harada təbliğ etməsini nəinki əsaslandıra bilməyib, əksinə özlərini gülünc duruma salıblar.
AzTV saytın gülünc duruma düşdüyünü əsaslandırmaq üçün əlavə edib ki, əvvəla, sözügedən telekanal ölkədə ailə-məişət, tərbiyə və milli dəyərləri təbliğ edən əsas kanaldır, ikincisi, yazıda faktiki əksər kanallarda yayımlanan seriallardan fotolar verilsə də, nədənsə, başlığa yalnız AzTV-nin loqosu çıxarılıb.
AzTV-nin müraciətinin son abzası olduqca maraqlıdır: “Əziz həmkarlar, əgər bütün bunları sifariş yox, reytinq naminə edirsinizsə ki, AzTV-nin loqosunu görüb yazını daha çox oxusunlar, gecikmisiniz. Çünki artıq nə AzTV o AzTV-dir, nə də oxucu o oxucudur. Biz dəyişmişik. Siz də dəyişin”.
Belə çıxır ki, oxucular AzTV-nin loqosunu görəndə həmin yazını oxumurlar. Çox maraqlıdır, əgər AzTV-də bunu bilirlərsə, sözün bitdiyi yerdir.
