Ümid Partiyasının 34 saylı Xətai ikinci Seçki Dairəsindən deputatlığa namizədi Nuran Tağıyev namizədliyi qeydə alınmadığı üçün Apellyasiya Məhkəməsinə şikayət ərizəsi ünvanlayıb.
Bu barədə Reportyor.info-ya onun özü bildirib.
Nuran Tağıyevin sözlərinə görə, Dairə Seçki Komissiyasının (DSK) onunla bağlı qərarı qanunsuzdur. “Qeydə alınmamağın səbəbi kimi guya imza vərəqələrində toplanan imzaların düzgün olmadığını deyirlər. Lakin iclasdan sonra DSK sədri özü etiraf etdi ki, bizlik bir şey yoxdur. Əlavə elədi ki, söz verirəm, əgər növbəti seçkilərə qədər bu dairədə sədr kimi qalsam sənin namizədliyini qeydə alacam. Sədr məndən şikayət etməməyim barədə xahiş edib. Eyni xahişi DSK-nın katibi Quliyev Teymur Yadulla oğlu da edib”, – deyə Nuran Tağıyev bildirib.
O, əlavə edib ki, DSK- nın qərarından MSK-ya şikayət etsə də, ərizəsi nəzərə alınmayıb: “MSK DSK-nın qərarını qüvvədə saxladı. Bu baxımdan, mən də Apellyasiya Məhkəməsinə şikayət ərizəsi ünvanladım”.
