Xalq artisti Ağadadaş Ağayev və “MedEra Hospitalı”nın mühafizəçisi bir-birilərinə xəsarət yetiriblər. Baş verən hadisə hospitalla bağlı müzakirələrə səbəb olub.
Pravda.az klinika ilə bağlı bəzi məlumatları təqdim edir:
Mediada dərc olunan xəbərlərə görə, “MedEra Hospital” klinikası Dövlət Gömrük Komitəsinin Tibbi Xidmət İdarəsinin keçmiş rəisi, 2018-ci ildə səs-küylü “dərman işi” ilə bağlı istintaqa cəlb edilmiş gömrük xidməti general-mayoru, professor Fikrət Qədiməliyev tərəfindən idarə olunur. Bir neçə il öncə Bakı Ağır Cinayətlər Məhkəməsi tərəfindən dərman vasitələrinin qanunsuz dövriyyəsi və qaçaqmalçılıqda təqsirləndirilərək həbs olunan Mərkəzi Gömrük Hospitalının professoru Fikrət Qədiməliyev azadlığa buraxılandan az sonra “MedEra Hospital” klinikasına direktor müavini təyin olunur. Bu xəstəxanada tez-tez rəhbər dəyişikliyi olsa da, ancaq əsas idarəçilik və səlahiyətlər hələ də Fikrət Qədiməliyevdədir.
Hospitalın saytında isə F.Qədiməliyev tibbi direktor kimi göstərilib. İcraçı direktor Lalə Babayevadır. O, “MedEra Hospital”ın təsisçisi Qaraxan Əliyevin qızıdır. Direktor isə İbrəhim Əliyevdir.
