Abşeron Rayon Məhkəməsində qəsdən sağlamlığa az ağır zərər vurmada təqsirləndirilən Xasay Dadaşovun (şərti) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Vaqif Həsənovun sədrliyi ilə keçirilən prosesdə hökm oxunub.
Məhkəmənin hökmü ilə icraata xitam verilib və o, cinayət məsuliyyətindən azad edilib.
İttihama görə, hadisə 12 aprel 2024-cü il tarixdə, saat 11 radələrində Abşeron rayonu, Xırdalan şəhərində yerləşən evlərin birində qeydə alınıb.
Belə ki, Xasay Dadaşov azyaşlı övladları ilə birlikdə kirayədə yaşayan keçmiş arvadı zərərçəkmiş Mələk Nağızadənin (şərti) qaldığı ünvana uşaqlarını ziyarət etmək üçün gəlib. Həmin ünvanda isə başqa kişinin olmasını görüb. Bununla bağlı olaraq o, zərərçəkmiş şəxsə irad bildirib. Qadın isə Xasaya etiraz edib. O isə bundan əsəbiləşərək Mələyin üzərinə hücum edib qəsdən yumruqla qadının sifət nahiyəsindən zərbə vurub, əli ilə boğazından tutub sıxmaqla yerə yıxıb. Nəticədə qadının alt çənəsinin hər iki oynaq çıxıntısı və cisminin yerdəyişən sınıqları, çənə nahiyəsinin əzilmiş-cırılmış yarası olub.
Hadisədən sonra Xasay Dadaşov cinayət məsuliyyətinə cəlb edilib.
