Azərbaycanda seksual xarakterli zorakılıq və məcbur etmə hallarına qarşı cəzaların sərtləşdirilməsi təklif edilir.
Open.az-ın əldə etdiyi məlumata görə, bununla bağlı Milli Məclisdə Cinayət Məcəlləsinin 150-ci (Seksual xarakterli zorakılıq hərəkətləri) və 151-ci (Seksual xarakterli hərəkətlərə məcbur etmə) maddələrinə dəyişikliyin müzakirəyə çıxarılması gözlənilir.
Dəyişikliyə əsasən, maddənin birinci bəndində “Zərərçəkmiş şəxsə və ya başqa şəxslərə zor tətbiq etməklə və ya belə zor tətbiq etmə hədəsi ilə və ya zərərçəkmiş şəxsin köməksiz vəziyyətindən istifadə etməklə uşaqbazlıq və ya seksual xarakterli digər zorakılıq hərəkətləri etmə”halının 4 ildən 6 ilədək azadlıqdan məhrum etmə cəzası, yaxud 7 ilə qədər azadlığın məhdudlaşdırılması cəzası ilə cəzalandırılması təklif olunur. Hazırda isə bu bəndin sanksiyası 3 ildən 5 ilədək azadlıqdan məhrum etmədir.
Təklifə əsasən həmçinin eyni əməllər:
– bir qrup şəxs, qabaqcadan əlbir olan bir qrup şəxs və ya mütəşəkkil dəstə tərəfindən törədildikdə;
– zərərçəkmiş şəxsin zöhrəvi xəstəliyə yoluxmasına səbəb olduqda;
– təqsirkar üçün aşkar surətdə yetkinlik yaşına çatmayan şəxs barəsində törədildikdə;
– zərərçəkmiş şəxsə və ya başqa şəxslərə qarşı xüsusi amansızlıqla törədildikdə;
– təkrar törədildikdə;
6 ildən 9 ilə qədər azadlıqdan məhrum etmə, yaxud 10 ilə qədər azadlığın məhdudlaşdırılması sanksiyaları təklif olunur. Hazırda isə bu hallar üzrə cəza sanksiyası 5 ildən 8 ilə qədər müddətə azadlıqdan məhrum etmədir.
151-ci maddəyə edilən təklifə əsasən isə əmlakının məhv edilməsi, zədələnməsi və ya götürülməsi hədəsi ilə və yaxud zərərçəkmiş şəxsin maddi və ya sair asılılığından istifadə etməklə onu cinsi əlaqəyə girməyə, uşaqbazlığa və ya seksual xarakterli digər hərəkətlərə məcbur etmə halı, 2 ildən 3 ilə qədər müddətə islah işləri və ya 2 ildən 3 ilə qədər azadlqıdan məhrum etmə cəcası, yaxud 3 ilə qədər azadlığın məhdudlaşdırılması cəzası ilə sanksiyalaşması təklif olunur.
Hazırda isə bu cinayətin sanksiyası 1 ildən 2 ilədək müddətə islah işləri və ya 1 ildən 3 ilədək müddətə azadlıqdan məhrum etmə cəzasıdır.
