Azərbaycanın görkəmli bəstəkarı Qara Qarayev sağ olsaydı, nəslinin reputasiyasına zərbə vuran qardaşı nəvəsi – mədəniyyət naziri Əbülfəs Qarayevə baş verənlərə görə kim bilir nələr deyərdi?!
Görəsən, ölkəmizin korifey sənətkarı Dövlət Təhlükəsizlik Xidmətinin Mədəniyyət Nazirliyində keçirdiyi anti-korrupsiya əməliyyatına, nazir müavini və digər vəzifəlilərin saxlanmasına hansı reaksiyanı verərdi?!
Reportyor.info xəbər verir ki, Əbülfəs Qarayev həmişə hökumət kabinetində ən sakit, kübar, şəcərəsi olan bir ailənin nümayəndəsi kimi tanınıb.
İnsafən demək lazımdır ki, onun adı bu günə qədər bir o qədər ağır cinayət işlərində, böyük maxinasiyalarda, maliyyə xəyanətlərində keçməyib. Lakin yanılmışıq.
Demə, hamıdan çox vəzifə tutan Ə.Qarayev 26 ildir xımır-xımır dövlətin malını dədə payı kimi talayırmış. Bəli, səhv etmirik, Əbülfəs Qarayev düz 26 ildir nazir vəzifəsi tutur.
Hər zaman Artur Rasizadə, Ramil Usubov, Səfər Əbiyev və digərləri niyə vəzifəsindən azad edilmir deyə ictimai qınaq olanda Ə.Qarayev cəmiyyətin diqqətindən kənarda qalmağı bacaraq yuxarıda adıçəkilən sabiq nazirlərin hər birindən çox vəzifədədir.
Məsələn, keçmiş daxili işlər naziri Ramil Usubov 25, sabiq baş nazir Artur Rasizadə 22 il, eks müdafiə naziri Səfər Əbiyev 18 il vəzifədə olub.
Uzun müddət nazir olan bir neçə nəfəri də əlavə etmək olar: Səhiyyə naziri Oqtay Şirəliyev, maliyyə naziri Samir Şərifov, keçmiş nazirlərdən – Ziya Məmmədov, Fazil Məmmədov, Misir Mərdanov və s. ilaxır…
Fəqət onların heç birinə Əbülfəs Qarayev qədər nazirlik kreslosu nəsib olmayıb. Əbülfəs Qarayev 1994-cü ildən 2001-dək gənclər və idman naziri olub. 2001-dən 2006-dək gənclər, idman və turizm naziri işləyib.
Bir gün də nazir kreslosunu boş buraxmayan Ə.Qarayev həmin tarixdən 2018-dək isə mədəniyyət və turizm naziri işləyib.
Nəhayət, 2018-ci ildən bəri indiyədək mədəniyyət naziridir. Üst-üstə Ə.Qarayev hamıdan çox – düz 26 ildir ki, nazir işləyir.
Və 26-cı ilin tən ortasında DTX MN-də əməliyyat keçirir: nazir müavini, idarə rəisi, mətbuat katibi saxlanılırlar.
İlkin araşdırmalardan belə məlum olur ki, bu “muşketyorlar” nazirliyin büdcəsini dədə malı kimi mənimsəyib, altından girib, üstündən çıxıblar.
Mədəniyyət Nazirliyi deyib keçməyin, burda yeyilən, yeyilə biləcək pulların sayı-hesabı yoxdur. Büdcədən bu nazirliyə o qədər pullar ayrılıb ki…
Tutulan məmurlar da o pullarla o qədər “mədəni oğurluq” ediblər ki, adam buna deməyə mədəni söz belə tapa bilmir.
Sadəcə, bu qədər korrupsiya və çirkabın içində hələ də Ə.Qarayevin istefa verməməsi utancverici haldır. Çox güman ki, prezident özü onu vəzifəsindən azad edəcək. Lakin mədəniyyət naziri özü bir istefa mədəniyyəti nümayiş etdirərək ərizə yazıb postunu təhvil verməliydi.
Onsuz da bu həbslərə görə istintaqa cəlb olunacaq, nazir özü sorğu-sual ediləcək. Axı müavini Rafiq Bayramovun nazirin xəbəri olmadan mənimsəmələrə yol verməsinə uşaq da inanmaz.
Ona görə də nazir tezliklə məsuliyyətə cəlb oluna bilər. Heç bir maliyyə maxinasiyası onun xəbəri olmadan həyata keçirilə bilməzdi.
Fikirləşin, gözəl Bakının arxitektural binaları niyə Mədəniyyət Nazirliyinin reyestrindən çıxarılaraq sökülür? Sökülməsi bir tərəfə, niyə dərhal onların yerində çoxmərtəbəli binalar tikilir?
Səbəb Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin sabiq rəisi Zakir Sultanov olmasın?
Şəhərə gözəllik verən binalar guya təmirsizlik, faydasızlıq arqumentləri ilə niyə göyə buxarlanırmış, indi bildinizmi? Bu cənabların bank hesabları qabarsın, pul qabları şişsin, xaricdəki mal-mülklərinin sayı artsın deyə.
Nazirin müavin Rafiq Bayramov isə büdcə vəsaitlərini talayıb, mədəniyyət şöbələrinə rəhbərləri rüşvət alıb təyin edib.
Yenə də bizə elə gələ bilər ki, mədəniyyət şöbəsi rəhbəri olmaq üçün müğənnilər, ya da digərləri niyə rüşvət vermək istəsin ki? İstəyirmiş, sən demə.
Reportyor.info xəbər verir ki, Əbülfəs Qarayev Fuad Poladovları, Rasim Balayevləri, Afaq Bəşirqızıları sevmir.
Onun ürəyindən keçənləri Zeynəb Xanlarova demişdi – inkişafdan danışın, tənqid, problem eşitməyək! Bu da nəticəsi.
Vaxtilə mərhum F.Poladov haqlı olaraq bildirmişdi ki, Azərbaycanda Mədəniyyət Nazirliyi yoxdur, Turizm Nazirliyi var.
Və bu ağır həqiqətin növbəti təsdiqinə son fəxri adların verilməsində şahid olduq. Nazir Əbülfəs Qarayev dövlət rəhbərliyinin masasına hazırlayıb göndərdiyi siyahıya ya baş-ayaq baxıb, ya da onun üçün mədəniyyət adamlarının meyarı başqa maraqlardan irəli gəlir.
Bir neçə il qabaq adları ixtisara salınan müğənnilər Prezident Administrasiyasına göndərilən siyahının sifarişlə, rüşvətlə hazırlandığını, ayrı-seçkilik edildiyini, Mədəniyyət Və Turizm Nazirliyinin hər zaman tapşırıqla yüksək vəzifəli şəxslərlə əlaqələri olan xanım müğənniləri irəli çəkdiyini, kişi müğənnilərdən isə bunun üçün haqq alındığını, fəxri adların əksər xanım müğənnilərə sənətlərinə görə yox, kimlərinsə xoşlarına gəldiklərinə görə verildiyini yazmışdılar.
Faktiki olaraq prezident tərəfindən mükafat kimi təqdim olunan fəxri adlar bir sıra məmurlar üçün alver mənbəyinə çevrilibmiş, bir çox yüksək vəzifəlilər isə bəzi xanım müğənnilərin “saqqızını” belə ad hədiyyələri ilə oğurlayırmışlar. Bütün bunlar da DTX tərəfindən araşdırılmalıdır.
Və bütün bu mədəni böhranın, təlatümlərin və depressiv vəziyyətin içində sonuncu işıqlı adamlardan olan Fəxrəddin Manafovu da küsdürüb teatrdan gedişinə yol açdılar.
Manafov son məktubunda nəzakətlə mədəniyyət ocağı olan teatrda mədəniyyətsizliyin ən dəhşətli cümləsini yazmışdı: “Qışqırmasan olmurdu…”
O mənzərəni təsəvvür edəndə 10-20 il sonra Azərbaycan teatr-film sənətinin hansı dövrü yaşayacağını təxmin edirsən.
Etdikcə də, yalnız mədə niyyəti olan Əbülfəs Qarayevin ünvanına ən xoş “arzularını” çatdırırsan.
26 il istinasız və fasiləsiz mədəniyyət sahəsinə rəhbərlik edən Əbülfəs Qarayevin ətrafında bu cür adamların olması onun birbaşa məsuliyyətidir. Hələ ki, hüquqi yox, mənəvi məsuliyyətidir.
Odur ki, DTX əməliyyatı nazirin gedişini şərtləndirir və qaçılmaz edir. Sadəcə, Qara Qarayev nəslinin nümayəndəsinin 26 illik nazir fəaliyyətinin üstündən özü bir xətt çəkdi və sonluq çox pis oldu…
REPORTYOR.info
