“Azərbaycanda bir neçə dəfə hakimiyyəti qeyri-konstitusiya yolu ilə ələ keçirmək cəhdləri olub və bu prosesdə ən aktiv olan Şimal qonşumuzdur. Şimal qonşumuz Azərbaycandakı uzantıları və tərəfdarları vasitəsilə ölkədə nəzarət imkanları əldə etmək və öz adamlarını önə çəkərək Azərbaycana təsir göstərmək istəyib. Hər dəfə bunun qarşısı alınıb, Azərbaycan xüsusi xidmət orqanları bu prosesləri vaxtında önləyə bilib”.
Bu sözləri Demokrat.az-a açıqlamasında deputat Arzuxan Əlizadə deyib.
O bildirib ki, Moskvanın Azərbaycandakı əsas fiqurlarından biri, bəlkə də birincisi Ramiz Mehdiyev olub:
“Uzun müddət önəmli vəzifə daşıyan bu şəxs ətrafında geniş çevrə formalaşdırmağa nail olub. Nəhayət, onun barəsində Dövlət Təhlükəsizliyi Xidmətində cinayət işi başlanılıb və dövlətə xəyanət, hakimiyyəti zorakı yolla ələ keçirməyə cəhd kimi ciddi ittihamlar irəli sürülüb. Bu ittihamda göstərilən cinayətin həyata keçirilməsi üçün komanda olmalı idi və bunu bir nəfərin təkbaşına etməsi mümkün deyil. Bu baxımdan Ramiz Mehdiyevin formalaşdırdığı komanda müəyyən edilməli və həmin şəxslər məsuliyyətə cəlb olunmalıdır. Bu istiqamətdə ciddi addımlar atılır”.
Deputat qeyd edib ki, rəsmi məlumat verilməsə də, bir çox şəxslərin istintaqa cəlb edildiyi və ifadə verdiyi məlumdur və artıq həbs olunanlar da var:
“Əli Kərimli də bu cinayət işi üzrə şübhəli şəxs qismində məsuliyyətə cəlb edilib, barələrində həbs qətimkan tədbiri seçilib, eləcə də bu çevrədən olan bir neçə nəfər məsuliyyətə cəlb olunub. Görünən odur ki, Dövlət Təhlükəsizliyi Xidmətinin bu şəxslərin məsuliyyətə cəlb edilməsinə əsas verən ciddi məlumatları var və onların barəsində həbs qətimkan tədbirinin seçilməsi də bununla bağlıdır. Bu proses davam edəcək və davam etməlidir. Azərbaycanda qeyri-konstitusiya yolu ilə hakimiyyəti ələ keçirməyə cəhd edən şəxslər tam müəyyən edilməli və hər biri məsuliyyət daşımalıdır”.
Onun sözlərinə görə, dövlət qarşısında xidmətləri olmuş şəxslər belə, bu xidmətlər nəzərə alınmadan məsuliyyətə cəlb edilməlidir:
“Çünki dövlətin suverenliyinə qarşı yönəlmiş zorakılıq fəaliyyəti ən böyük cinayətdir və heç bir halda əfv edilə bilməz. Bu istiqamətdə fəaliyyət göstərən hər kəs məsuliyyətə cəlb olunmalıdır. Dövlət maraqları və milli təhlükəsizlik hər şeydən öndədir və kimliyindən asılı olmayaraq bu prosesdə iştirak edən hər kəs sərt şəkildə cəzalandırılmalıdır. Azərbaycan hüquq-mühafizə orqanların peşəkarlığına tam əminəm. Proses sona qədər davam edəcək və bu məsələdə günahı olan hər bir kəs layiqli cəzasını alacaq”.
