Bakı Beynəlxalq Dəniz Ticarət Limanının ərazisində avtokar sürücüsü Anar Ərəbovun üzərində pambıq kipləri düşərək ölübmüş.
Hadisə 16 may 2023-cü ildə, saat 21.00 radələrində baş verib.
Hadisə ilə bağlı 5 avqust 1995-ci il təvəllüdlü Ağdam rayon sakini, limanın tabeçiliyində fəaliyyət göstərən MMC-də iş icraçısı vəzifəsində işləmiş Pərviz Salmanov “təhlükəsizlik tədbirlərini təmin etməməsinə görə” cəzalandırılıb.
Məhkəmənin qərarı ilə Pərviz Salamanov Cinayət Məcəlləsinin 162.2-ci maddəsində nəzərdə tutulmuş cinayət əməlini törətməkdə təqsirli bilinərək, 1 il 6 ay müddətə texniki təhlükəsizlik və əməyin mühafizəsi sahəsində maddi-məsul vəzifə tutmaq hüququndan məhrum edilməklə 2 il 6 ay müddətə şərti azadlıqdan məhrum etmə cəzasına məhkum edilib.
Hadisəyə gəlincə, həmin vaxt limanın həyətində “TIR”larda olan preslənmiş pambıq yükünün boşaldılması prosesi həyata keçirilib. Abşeron rayonu, Saray qəsəbə sakini Anar Ərəbov yükün boşaldılması üçün avtokar sürücüsü təyin edilib. İş bölgüsü iş icraçısı, növbə rəisi vəzifəsində işləyən təqsirləndirilən şəxs tərəfindən həyata keçirilib.
Hadisə zamanı Anar Ərəbov idarə etdiyi avtokarla “TIR”a yaxınlaşıb. Həmin vaxt işarəçi ona dayanması barədə göstəriş verib. Anar Ərəbov əməliyyat zonasına daxil olduqdan sonra yükü götürməyə hazır vəziyyətdə dayanıb. Daha sonra əməliyyat zonasına daxil olaraq, taxta ilə yükü düzəltmək istədiyini deyib. Vurğun adlı işarəverici bir neçə dəfə qışqıraraq, onun yükdən uzaqlaşmasını istəyib. Anidən preslənmiş pambıq yükünün sürüşərək Anarın üzərinə düşüb və nəticədə mərhum hadisə yerində dünyasını dəyişib (Qaynarinfo).
