Orduya dəstək mitinqi zamanı təxribat təşkil etdiklərinə görə həbs olunanlar arasında AXCP sədri Əli Kərimlinin müşaviri Asif Yusifli də var.
Reportyor.info-nun məlumatına görə, Asif Yusifli iyulun 14-dən 15-nə keçən gecə Orduya dəstək aksiyası zamanı ictimai asayişi pozmaqda ittiham olunur.
Əli Kərimlinin müşavirinə qarşı Cinayət Məcəlləsinin bir neçə maddəsi ilə cinayət işi başlanıb və materiallar məhkəməyə göndərilib. Məhkəmənin qərarı ilə o, üç ay müddətinə həbs edilib.
Xatırladaq ki, bundan əvvəl Daxili İşlər Nazirliyi Bakıda Orduya dəstək mitinqi zamanı təxribatlar təşkil edən bir qrup şəxsin həbs olunduğu barədə məlumat yayıb.
Məlumatda bildirilir ki, dinc və vətənpərvər ruhda keçən bu aksiya zamanı bir qrup şəxs ictimai qaydanın kobud surətdə pozulmasına səbəb olan hərəkətlərə yol verərək, Milli Məclisin inzibati binasının qapı-pəncərələrini sındıraraq içəriyə daxil olublar, aksiyanın təhlükəsizliyini təmin edən polis əməkdaşlarına müqavimət göstərməklə zor tətbiq ediblər.
