Bir neçə gün öncə Baş Prokurorluq Zülfüqarlı qardaşlarına məxsus polad istehsalı üzrə kustar sexdə baş vermiş bədbəxt hadisə barədə məlumat yaymışdı.
Elementar təhlükəsizlik qaydalarına riayət edilməməsi ucbatından içərisində yanacaq olan dəmir çən partlamışdı. Hadisə nəticəsində sexin fəhləsi – Masallı rayonunun sakini Ağamalı Qurbanov həlak olmuşdu.
Fakt üzrə Abşeron Rayon Prokurorluğunda Azərbaycan Respublikasının Cinayət Məcəlləsinin 162.2-ci maddəsi ilə (təhlükəsizlik qaydalarının pozulması üzündən insan ölümü) cinayət işinə başlanıb.
Lakin virtualaz.org-a məlum olub ki, bu, həmin sexdə baş vermiş ilk faciəvi hadisə deyil. 20 gün əvvəl armatur istehsalı prosesində fəhlə həlak olub. Armaturun bir hissəsi fəhlənin qarnını cırıb və onu xilas etmək mümkün olmayıb.
Bu fəhlənin də ölümü kustar sexdə təhlükəsizlik qaydalarına riayət edilməməsi üzündən baş verib. Sexin rəhbərliyi o zaman faciəvi hadisəni ört-basdır etmək istəyib. Lakin virtualaz.org-un redaksiyası fəhlənin ölümü ilə bağlı təkzibolunmaz sübutlara malikdir.
Bununla bağlı virtualaz.org Baş Prokurorluğa hadisəyə aydınlıq gətirilməsi ilə əlaqədar sorğu ilə müraciət edib.
Qeyd edək ki, daha öncə virtualaz.org Zülfüqarlı qardaşlarının Azərbaycanda sistemli şəkildə qeyri-leqal və qeyri-qanuni biznes qurduqlarından yazmışdı. Hazırda dörd gizli sex bu qeyri-leqal şəbəkəyə daxildir.
Discussion about this post