Trampın müşaviri Putinlə görüşəcək

Rusiya prezidenti Vladimir Putin bu gün ABŞ prezidenti Donald Trampın milli təhlükəsizlik üzrə müşaviri Con Boltonu qəbul edəcək.

Bunu RİA Novosti-yə Rusiya prezidentinin mətbuat katibi Dmitri Peskov deyib.

Xatırladaq ki, oktyabrın 20-də ABŞ prezidenti Donald Tramp Rusiya ilə orta və kiçik mənzilli raketlərin ləğvi haqqında müqavilədən çıxacağını bildirmişdi. Onun sözlərinə görə, ABŞ-ın bu müqavilədən çıxmasına səbəb Rusiyanın müqavilənin şərtlərini pozmasıdır.

Ondan sonra D.Peskov bildirmişdi ki, Rusiya ilə orta və kiçik mənzilli raketlərin ləğvi haqqında müqavilədən çıxma barədə ABŞ tərəfindən izah tələb olunacaq.

Yeri gəlmişkən, dünən Con Bolton Moskvada Rusiya Təhlükəsizlik Şurasının katibi Nikolay Patruşevlə qapalı görüş keçirib.

Qeyd edək ki, orta və kiçik mənzilli raketlərin ləğvi haqqında müqavilə 1987-ci ilin 8 dekabrında Mixail Qorbaçovun Vaşinqtona səfəri zamanı imzalanıb.

Onu da qeyd edək ki, Con Bolton Rusiyadan sonra oktyabrın 24-də Azərbaycana gələcək.