Tovuzun bir həftədən çoxdur düşmənə sinə gərən, atəş altında saxlanmasına baxmayaraq, yurd-yuvasında ordusu, əsgəri, polisi ilə birlikdə mətin dayanan qəhrəman Ağdam kəndindəyik.
Reportyor.info xəbər verir ki, hazırda kənddə sakitlikdir, Ağdam camaatı öz iş-gücündədir, insanların əhval-ruhiyyəsi yüksəkdir, düşmənin kənd əhlinin ev-eşiyindən qaçması haqda yaydığı dezinformasiyalar yerlə-yeksan olunub.
Çünki təkcə Ağdam kəndinin sakinləri yox, qorxmaz və vətənpərvər polislərimiz, o cümlədən hərbi həkimlərimiz də insanlarla bir yerdədir.
Bizim çəkiliş apararkən müşahidələrimiz ondan ibarət oldu ki, Tovuzun Ağdam kəndində – düşmənlə üzbəüzdə polislərimiz gecə-gündüz keşik çəkir, xalqın yanındadır, ayıq-sayıqdır və hər an döyüşə də hazırdırlar.
Onlar belə çətin günlərdə Ağdam camaatının yanından getmirlər, gözdə-qulaqdadırlar, kəndi yüksək səviyyədə mühafizə edirlər.
Həmçinin, Tovuzun Quşçu Dondar, Yuxarı Öysüzlü, düşmənə qarşı mərdanə şəkildə dayanan digər kəndlərində də asayiş ən peşəkar şəkildə təmin olunub.
Eynilə hərbi həkimlərimiz də dəyanətli və möhkəmdirlər. Onlardan biri ilə söhbətimizdə dedi ki, vətən üçün təkcə doktor kimi deyil, həm də döyüşçü olaraq vuruşmağa hazırdır.
Ümumiyyətlə, Ağdam kəndində olarkən müşahidələrimiz zamanı onu da gördük ki, iyulun 12-dən bəri, 1 həftədir Tovuzun polisi və rəhbərliyi ev-eşik üzü görmür. Onların evi də, yuvası da Ağdam kəndidir.
Qeyd edək ki, Tovuzun mərkəzindən Ağdama gedən bütün yollarda polis postları var. Kənd istiqamətində hərəkət edən avtomobillər, piyadalar bir-bir yoxlanılır.
Kənar şəxslərin kəndə girişinə icazə verilmir. Yalnız kənd sakinləri, icazəsi olan jurnalistlər və rəsmilər kəndə gədə bilərlər.
Ağdam kəndinə girişdə qurulan son postda da polis əməkdaşları hərbçilərimizlə birgə xidmət aparırlar. Bundan başqa, kənddə hava qaraldıqdan sonra polis postlarının sayı artırılır.
Hava işıqlananadək silahlı polis əməkdaşları cəbhəyə ən yaxın evlərin qarşısından başlayaraq kəndin bütün ərazisində xidmət aparır.
Discussion about this post