Müasir Müsavat Partiyası: “Bəzi buqələmun saytlar Rafael Cəbrayılova qahmar çıxır”
“Bəzi buqələmun xəbər portalları dələduzluq əməllərinə görə mandatına xitam verilmiş Rafael Cəbrayılova qahmar çıxıblar və fırıldaqçı adamı müdafiə edərək Hafiz Hacıyevə qarşı ucuz kampaniya aparırlar”.
Reportyor.info xəbər verir ki, bu sətirlər Müasir Müsavat Partiyasının mətbuat xidmətinin yaydığı bəyanatda yer alıb.
MMP-nin yaydığı açıqlamada deyilir ki, keçmiş deputat R.Cəbrayılovu “tumarlayan” bəzi saytlar deyəsən, “fil qulağında yatıblar”.
“Xüsusən, 7news.az, oxu.az saytları Mərkəzi Seçki Komissiyasının, Yeni Azərbaycan Partiyasının mövqeyindən xəbərsizdir. Bu sayt saxtakarı, vergidən yayınanı, vətəndaşlara pul atan dələduzu elə müdafiə edir ki, sanki mələkdir.
Bütün ölkə onun hansı hoqqalardan çıxdığını gördü, bəzi saytlar isə “görmədilər”. Biz onları gözlərini açmağa çağırırıq. Çünki Rafael Cəbrayılovun sifarişi ilə Hafiz Hacıyev haqda böhtan, hədyan yazanlar unutmasınlar ki, deputatlığı dövründə vətəndaşları aldadan, kiminə 300 min, kiminə 200 min borclu qalan, mandatını girov qoyan, 200 evi satışa çıxaran Hafiz Hacıyev olmayıb, təriflədikləri saxtakar, fırıldaqçı, alverçi Rafael Cəbrayılov olub.
Gündəmə gəlmək istəyən, tiraj, İP toplamaq arzusunda olan saytlar hansısa dələduzun göstərişləri ilə hərəkət etməsinlər, özlərini ucuz satmasınlar. Axı bu fırıldaqçı adamın kim olduğunu bütün respublika gördü”, – deyə bəyanatda vurğulanıb.
MMP bildirir ki, mətbuat diqqətli olmalı, MSK-nın R.Cəbrayılov barəsində çıxardığı qərara istinad etməlidir: “Bəzi saytlar bu dələduz adama nəyə görə möhtacdırlar, niyə onu müdafiə edirlər, Hafiz Hacıyevə qarşı çirkin kampaniyanı nə üçün aparırlar, hər şey kənardan aydın görünür. Bu ölkədə rüşvətxor məmura, nazirə yaltaqlanan, ondan qidalanan saytlar olmuşdu, mandatı ləğv edilmiş dələduz keçmiş deputatı müdafiə edib, Hafiz Hacıyevə böhtan atanlar olmamışdı.
Ümidvarıq ki, bu saytlar MSK-nın, Milli Məclisin spikerinin, YAP-ın rəsmi şəxslərinin açıqlamaları ilə yaxından bir daha tanış olacaqlar”.
Müasir Müsavat Partiyasının mətbuat xidməti