Köçəryan əslən Xankəndidəndir. Əslində Azərbaycan SSRİ vətəndaşıdır. Azərbaycana, yerli əhaliyə qarşı müxtəlif cinayətlər törədib. Köçəryanla bağlı Azərbaycanda cinayət işinin açılması və onun ölkəyə ekstradisiyasının təşkil edilməsi mümkündürmü?
Məsələ ilə bağlı Axar.az-a danışam beynəlxalq hüquq üzrə professor Fərhad Mehdiyev bildirib ki, ermənilər onu əsla bizə verməz:
“Ermənilər onu Azərbaycana verən hökuməti hakimiyyətdə də saxlamaz. Çünki bu erməni milli davasına xəyanət kimi qəbul edilə bilər. Ermənistan prezidenti olmuş, Qarabağ müharibəsində iştirak etmiş şəxsi onlar Azərbaycana ekstradisiya etməz. Bunu heç ehtimal etmək də olmaz”.
F.Mehdiyev qeyd edib ki, ekstradisiya adətən iki ölkə arasında ikili müqavilə əsasında həyata keçirilir:
“Azərbaycan və Ermənistan müharibə vəziyyətində olduğuna görə belə bir müqavilənin olması mümkün deyil. Köçəryan keçmiş Azərbaycan SSRİ-də doğulmuş olsa da, Ermənistan vətəndaşıdır. O, Ermənistanın 2-ci prezidenti olub. Ölkələr adətən öz vətəndaşlarını başqa dövlətə vermirlər”.
F.Mehdiyev vurğulayıb ki, Dağlıq Qarabağ məsələsində Ermənistan cəmiyyətində hər hansı bir qınama mövcud deyil:
“Ramil Səfərov məsələsinə görə, Ermənistan hələ də Macarıstanla diplomatik münasibətləri bərpa etməyib. Ermənistan cəmiyyətində azərbaycanlılar ilə münaqişə havası qalmaqdadır. Bu səbəbdən də Köçəryanı azərbaycanlılara qarşı cinayət törədib səbəbi ilə Ermənistandan istəyə bilmərik. Diplomatik münasibətlərimiz olmadığına görə, ümumiyyətlə belə tələblə müraciət edə bilmərik”.
F.Mehdiyevin sözlərinə görə, Robert Köçəryanın indi həbs edilməsinin səbəbi onun öz xalqına qarşı cinayəti deyil:
“Rusiya Köçəryanı erməni siyasətinə daxil edərək, Ermənistanı təkrar Rusiyanın orbitinə qaytarmaq niyyətində idi. Məhz bu planın qarşısını almaq üçün Köçəryan tutuldu. Sərkisyanın özü də dinc nümayişçilərə qarşı kifayət qədər ciddi güc tətbiq edən şəxslərdəndir. Paşinyan Saakaşvili kimi bütün oliqarxlara qarşı eyni siyasəti yürütməyəcək. Çünki Paşinyanın güclənməsi üçün oliqarxların gücünə ehtiyacı var. Paşinyan seçərək siyasət həyata keçirir. Müəyyən şəxslərə qarşı həyata keçirdiyi siyasəti bəzi şəxslərə qarşı tətbiq etmir. Bunun səbəbi odur ki, Paşinyan Ermənistan cəmiyyətində kifayət qədər güclü deyil. Doğrudur, o, xalqın dəstəyi ilə hakimiyyətə gəldi. Amma bütün prosesləri əlində saxlaya bilməsi üçün bu kifayət etmir. Özünə qarşı istifadə edilməsi mümkün olan şəxsləri aradan götürəndən sonra Paşinyan daha aktiv, daha gözlənilməz addımlar atacaq”.
