Jurnalistdən gömrük şefinə: “Millətin qanını sormalısınız?”
Tanınmış jurnalist, “Yeniçağ.az” saytının baş redaktoru Aqil Ələsgər Azərbaycan Gömrük Komitəsindən şikayət edib. Sosial şəbəkədə öz profilində DGK-nin sədri Səfər Mehdiyevə müraciət edən jurnalist yazır:
“Azərbaycanda islahatın imitasiyası deyil, islahat başlamalıdırsa, ilk yer gömrük olmalıdır. İş adamlarının boğazına zəli kimi yapışmış, qanını soran Dövlət Gömrük Komitəsi ləğv edilməsə, Azərbaycanda inkişafdan danışmaq əbəsdir”.
A.Ələsgər qeyd edib: “Üç-beş baş redaktorla antrikot-dana basdırması yeməklə islahat olmur, Səfər Mehdiyev. Üç-beş adam yazmadı deyə, sizin qanunsuzluqlarınızın üstünün örtüləcəyini sanırsınız? İnsanın şəxsi istifadəsi üçün gətirdiyi və 1000 dolların altında olan mala 36 faiz vergi istəmək hansı qanunda yazıb, Səfər Mehdiyev???
İşçiləriniz 36 faizdən aşağı faizin olduğunu bilmirlər? Sırf ay sonu o faizdən hissə alacaqlar deyə, millətin qanını sormalısınız??? Bəsdirin də insanların əsəbləri ilə oynadınız!!!”