…Hüseyn, adı gözəl, özü gözəl Hüseyn. Adı kimi şəhidlik taleyinə və alnına çoxdan yazılmış Hüseyn!!!
Kərbəla müsibətinin öz sərkərdəsi, qəhrəmanı, şəriksiz və şəksiz nər oğlu Hüseyn idisə, Vətən müharibəsinin də dastana çevriləcək şücaətli övladı Hüseyn idi. Bu bəxtsiz, qismətində ən böyük sevinci, şəhadəti elə şəhidlik olan Hüseyni sizə təqdim etməsəydik, qəlbimiz viran qalardı.
Bəli, Əliyev Hüseyn Sahib oğlu… Reportyor.info qısa arayış verir ki, o, 15 sentyabr 2000-ci ildə Tovuzun Əsrik Cırdaxan kəndində anadan olub.
20 illik yubileyi tamam olan, doğum günündən cəmi 12 gün sonra başlamış Vətən müharibəsində iştirak edən H.Əliyev bir salnamədir.
Onun haqqında kitablar yazılacaq, dərsiklərə adı salınacaq, gələcək nəsillər nümunə götürəcəklər. Cəmi-cümlətani 20 yaşlı Hüseyn bütün ümidlərini ordudakı xidmətinə bağlamışdı.
Gəlin, lap başdan danışaq onun hekayətini – Hüseyni nənəsi və babası min bir əziyyətlə böyüdüb. O qədər zəhmətkeş uşaq olub ki, babasının gözünün qabağından heç yerə getməyib.
Hüseyn babası ilə meşədən odun gətirirmiş, yükü belinə şələləyib özünü çətinə salırmış. Ona balaca vaxtı Totu deyirdilər.
Ümumiyyətlə, Hüseyn çox çətinliklə böyümüşdü. Ata-ana nəvazişi görməyən bu tifil gənc Zivə nənəsinin və Valeh babasının himayəsində tərbiyə almışdı.
İllər keçir, zaman ötür, Hüseyn həddi-buluğ yaşını da ötür, yekə kişi olur və orduya yazılır. Hə, bax, uşaqlıqdan taleyi gətirməyən, əzab-əziyyətlə böyüyən bu zəhmətkeş insanın ömrü qısa, nakam olur.
Yaxınları danışırlar ki, Hüseyn orduya gedəndə ilk arzusunu tutub. Müddətdən Artıq Hərbi Xidmət edən (MAXE) Hüseyn deyirmiş ki, “ilk maaşımı alanda, nənəmin qəbrini düzəltdirəcəm…”
Hüseyndə döyüşlərə atılır və son dəfə atası ilə oktyabrın 2-də danışır, sonra əlaqə kəsilir. Olmadı, Hüseyn, nənənin məzarını düzəltdirə bilmədin, qəhrəman bala…
Sənin öz məzarını düzəltməli oldular. Amma qoy, göylər ağlasın, dünya vəlvələyə gəlsin, yer titrəsin, hamı sənə ağlasın, hamı səni balası bilsin, nənənin ruhu daş olsun, sən Azərbaycana məxsussan, sən ata-ananın yox, bu vətənin övladısan, sən ən UCA ZİRVƏDƏSƏN!
O zirvədə ki, sənin qanın hesabına biz torpaqlarımızı 27 il sonra işğaldan azad elədik. Haqqını halal elə, şəhidimiz Hüseyn. Şəhadətin mübarək…
Arifə
Discussion about this post