Rəhmətlik ustad yazar Məmməd Nazimoğlunun yaxşı bir sözü varıydı: bəzi jurnalistlərin başı ginekoloqların əli çatmayan yerlərə girir.
İndi ölkədə göbələk kimi artan “sarı mətbuat”ın həmin mamaça-jurnalistləri, “qələmindən süd iyi” gələnlər özləri üçün olduqca əttökən, “qlobal, geosiyasi” mövzu tapıblar: hamının efirdən yaxşı tanıdığı müğənni Şəbnəm Tovuzlunun həyat və yaradıcılığında yalnız həyatından yazmaq!!!
“Alt paltarı” jurnalistikası ilə məşğul olan bu xəbər portallarının “başsız redaktorları”, “ucuz ətin şorbasından” ucuz və bayağı sensasiya düzəltməyə çalışan müxbirləri Ş.Tovuzlunun ümidinə qalıblar.
Müğənninin şəxsi həyatından “min bir gecə nağılları” yaradan Allah qoymasa, həmin “peşəkar” jurnalistlər saytlarında oxunma sayğacını belə ucuz şou informasiyalar tirajlamaqla qaldırırlar.
Ş.Tovuzlunun yaradıcı işləri bir yana qalıb, ancaq həyatına, mətbəxinə, az qala yatağına girib çəkiliş aparmaq istəyirlər ki, görəsən müğənni necə yaşayır, nə yeyir, nə içir…Axı sizə nə?
Gah yazırlar ki, həyat yoldaşı konsertini helikopterlə izləyəcək, gah yazırlar ki, övladının atası filankəsdir, gah yazırlar əri tərəfindən incidilir…Budurmu sizin jurnalistika? Budurmu peşəkar media? Siz də jurnalist, biz də…?
Ölkədəki yüzlərlə sosial problemlərdən, iqtisadi hadisələrdən, məmur özbaşınalığı, haqsızlığı ilə üzləşən vətəndaşların, köçkünlərin, şəhid ailələrinin dərdindən yazmağa “yuneskosu” çatmayanlar Şəbnəm Tovuzlunun barəsində guya hansısa “araşdırma” aparıb cəmiyyəti məhvərindən oynadan “ifşa” xarakterli məlumatlar əldə edirlər.
Bunu yazanlar nəzərə almırlar ki, o müğənni, ictimai fiqur olmaqla yanaşı bir qadındır, anadır, bir ailəli insandır və hər hansı informasiya olanda ən azı jurnalistikanın qırmızı qaydası olan qarşı tərəfin fikrini öyrənmək üçün Şəbnəm Tovuzluya zəng etmək çətin iş deyil.
Əmma…“dekolte jurnalistləri” üçün həyati əhəmiyyətli iş Şəbnəmin şəxsi həyatına əyri burunlarını və əyri, bisavad qələmlərini soxmaqdır. Həyasızlığın dibidir.
Ən dəhşətlisi belələrinin üzündən bütün mətbuat ləkələnir, jurnalistlər gözdən salınırlar. Kim külli ixtiyar verib ki, sizin ucbatınızdan “qurunun oduna yaş da yansın”?!
Bu anlamda doğurdan da mərhum Məmməd Nazimoğlu haqlı imiş və fikirləri aktualdır: bəzi jurnalistlərin başı ginekoloqların əli çatmayan yerlərə girir.
Onların sancısı, dərdi, ağrısı Şəbnəm Tovuzludur. Sanki bu xanımdan savayı ölkədə qurdalamağa ifaçı, aktrisa yoxdur.
Efirdəki ağzından horra tökülən bəzi aparıcıları, biabırçı verilişləri tənqid etməyə, MTRŞ sədri Nuşirəvan Məhərrəmliyə sözünü deməyə cəsarəti çatmayanlar, evi qanunsuz sökülən, torpağı əlindən zorla alınan, məhkəmələrdə, idarələrin qapılarında süründürülən, məmurların qoçuları tərəfindən döyülən, icra başçıları tərəfindən aşağılanan vətəndaşların harayını yazmağa icazəsi olmayanlar üçün mətbuat, söz azadlığı Şəbnəm Tovuzlunun şəxsi həyatına çomaq soxmaqla məhdudlaşır. Yesinlər sizin sarılıq xəstəliyinə tutulan, sancı çəkən mətbuatınızı…
Buna heç sarılıq mətbuatı da demək olmaz, “ginekoloq jurnalistlərin” Şəbnəm Tovuzlu dərdi, Şəbnəm Tovuzlu sancısı adlandırmaq olar.
Jurnalist müğənninin pulunu sayırsa, ondan qeybət yazırsa, əri ilə münasibətlərindən dezinformasiyalar uydurursa, onda həmin müxbir ya da baş redaktor “yüngül jurnalistika tərzi” ilə məşğuldur və çörəyini Şəbnəm Tovuzlunun şəxsi həyatına burun soxmaqla çıxarır…Nə deyirik, nuş olsun!!!
REPORTYOR.info
Ə.Arifə
Discussion about this post