Səbail Rayon Məhkəməsində Xarici İşlər Nazirliyinin (XİN) Konsulluq İdarəsinin sabiq rəisi Faiq Bağırovun barəsində seçilən həbs-qətimkan tədbirinin ev dustaqlığı ilə əvəz edilməsinə dair vəsatəti təmin olunub. Qeyd edək ki, F.Bağırov Dövlət Təhlükəsizliyi Xidməti tərəfindən saxlanılıb. Ona Cinayət Məcəlləsinin 311-ci (rüşvət alma) maddəsi ilə ittiham verilib.
İlk baxışdan qeyri-adi, diqqətçəkən məqam nəzərə çarpmasa da, Faiq Bağırovun sabiq xarici işlər naziri Elmar Məmmədyarova yaxın kadr olması, birbaşa olaraq onun göstərişlərini icra etməsi məsələnin mahiyyətini dəyişir. Belə iddialar var ki. Elmar Məmmədyarov sabiq milli təhlükəsizlik naziri Eldar Mahmudovun “yolunu gedir”. Üstəlik, Qarabağ ətrafında baş verən gərginliyə də 16 il nazir işləməsinə baxmayaraq, münasibət bildirmir.
Milli Məclisin deputatı, Ana Vətən Partiyasının (AVP) sədri Fəzail Ağamalı “Yeni Müsavat”a deyib ki, Azərbaycanın sabiq xarici işlər naziri Elmar Məmmədyarovun əməlləri tam və hərtərəfli araşdırılmalıdır:
“Elmar Məmmədyarov hələ vəzifədə olarkən onun Azərbaycanın dövlət maraqlarına, ölkə Prezidentinin ”hücum diplomatiyası”na daban-dabana zidd olan fəaliyyətini dilə gətirmişəm, kəskin şəkildə tənqid etmişəm.
Nəhayətdə o öz əməllərinə görə vəzifədən uzaqlaşdırılıb, ətrafı həbsə alınıb. Bundan sonra da onun əməllərinə görə qiymət veriləcəyinə əminəm, hesab edirəm ki, qiymətini ala-ala da gedəcək”.
Discussion about this post