Deputat: “Bəzi yeni nazirlər yerlərinə oturuşmayıblar”

11 Sentyabr 2019 - 10:38
139 oxunma

Deputat Qüdrət Həsənquliyev hakimiyyətə səslənib. Onun sözlərinə görə, islahatların gecikməsi iqtidarı xalqın böyük ictimai dəstəyindən məhrum edə bilər ki, bu da ölkəmizi təxribatlar qarşısında zəif edərdi:

“Hər hansı təxribatın arzuolunmaz ekstremist qüvvələrin hakimiyyətinə yol aça biləcəyindən əndişələnən xarici güclər, hətta daxildə ölkəni gücləndirəcək islahatların aparılmasında maraqlı olmasa da, Azərbaycanın daxili siyasətinə daha ciddi müdaxilə etmək barədə düşünər, iqtidar bu gün malik olduğu beynəlxalq dəstəyi itirərdi.

Yalnız güc strukturlarının peşəkarlığına və sədaqətinə güvənmək aşırı arxayınlıq olardı. İqtidar, nə qədər ki, güclüdür, prosesin ağrılı olmasına baxmayaraq, cəsarətli qərarlar qəbul etməlidir.

İlk növbədə kadr islahatları davam etdirilməlidir. Onilliklər ərzində eyni yüksək vəzifəni tutan kadrların ən azından yeri dəyişdirilməlidir.  Bu insanların bir qismi feodallaşmış, böyük iddialara düşməklə yanaşı, hətta adi insanlıq keyfiyyətlərini belə itiriblər. İnsanları, onları istismar edib ev-eşiyindən didərgin salmış məmurlardan xilas etməklə, geniş xalq kütlələrinin rəğbətini qazanmaq olar”.

Onun fikirlərinə münasibət bildirən həmkarı, yazıçı-deputat Aqil Abbas isə musavat.com-a qeyd edib ki, prezidentin həyata keçirdiyi islahatlar onu qane edir. A.Abbas düşünmür ki, ölkədə aparılan reformalar gecikir:

“Birdən-birə, 7 ayın içində hər şeyi həll etmək mümkün deyil. Bir günün içində inqilab olmur. Möhtərəm prezident sosialyönümlü dəyişikliklər edir, fərmanlar verir, minimum əmək haqqı artırılıb, hamısı da xalq tərəfindən xoş qarşılanır. Mən Qüdrət müəllimin açıqlamalarını oxumuşam, təbii ki, öz mövqeyidir. Ancaq hamını birdən işdən çıxarmaq olmur. Biz 2020-ci ildə də genişmiqyaslı islahatlar görəcəyik”.

Deputat uzun müddət vəzifədə olan şəxslərin işdən çıxarılmasının zəruri olmasına belə münasibət sərgilədi: “Əvvəla, kimi işdən azad etmək, kimi təyin etmək prezidentin səlahiyyətindədir.  Əgər həmin nazir və ya məmur dövlət rəhbərinin etimadı doğruldursa, xalqa, dövlətə xidmət edirsə, onu niyə işdən çıxarsın ki?!

Əksinə, yetişmiş, müdrikləşmiş bir kadrı vəzifədən çıxarmaq, yerinə cavan birini gətirməklə islahatlar tərsinə dövran edə bilər. Yaşı keçib demək olmaz. Bu gün hökumətdə cavan nazir də var, yaşlısı da… Məsələyə o cür yanaşmağın tərəfdarı deyiləm.

Sən təcrübəsiz bir kadrı nazir qoyarsan, sonu pis olar. Bu gün bəzi təzə nazirlər hələ yerlərinə oturuşa bilməyiblər. Çünki vəzifəyə gələn kimi 20-30 ilin kadrlarını nazirliklərdən kənarlaşdırdılar, yerlərinə vaxtilə bir yerdə işlədikləri cavanları gətirdilər. Baxırsan ki, gələn həmin kadrlar heç o sahəni bilmirlər.

Köhnə nazirin kadrısan deyib, onu işdən azad eləmək nə deməkdir? Axı o, mütəxəssisdir, təcrübəli kadrdır. Sən hansı metodla desən işləyəcək, nazirlikdən uzaqlaşdırmağa ehtiyac yoxdur”.

 

Sosial şəbəkədə paylaş

Share to MyWorld
Share to Odnoklassniki
Share to Yandex
Reportyor.info saytının redaksiyası ilə əlaqə:Telefon - 0553490491, Email - reportyor.info@gmail.com



Baş redaktor: Arifə Əliyeva Vahid qızı

Reportyor.info saytının redaksiyası ilə əlaqə:
Telefon; +994553490491, +994706307040
email - reportyor.info@gmail.com

Giriş | Hazırladı "Qurdqanlı Design"