Azərbaycanın şimal və cənub zonaları həmişə həssas regionlar olublar. Buna səbəb birində Rusiya, digərində isə İranla həmsərhəd olmağımızdır.
O baxımdan hakimiyyət İran və Rusiya ilə sərhəd bölgələrə xüsusi diqqət ayırıb, hansısa dairələrin məkrli planlar qurmasının qarşısını almağa çalışıb.
Çünki ölkəni içindən qarışdırmaq planı hər zaman cənub və şimal bölgəsindən olub və ötən illərdə müəyyən qüvvələrin cəhdləri nəticəsiz qalıb.
Misal üçün 2012-ci ildə Quba hadisələrini göstərmək olar ki, iqtidar prosesin miqyasının genişlənməsinə imkan vermədi, bir məmur özbaşınalığına qəzəblənmiş kütləni sakitləşdirməyə nail oldu.
Bir icra başçısının qudurğanlığı, yekəxana çıxışı böyük fəlakətə, araqarışdıranların fitnəsinə gətirib çıxara bilərdi. Eləcə də 2016-ci ilin yanvarında Siyəzəndə bahalaşma əleyhinə kütləvi aksiyaları, həbsləri qeyd etmək olar.
Devalvasiyadan sonra iqtisadi vəziyyətin pisləşməsi və vəziyyətdən sui-istifadə edən möhtəkirlərin, bəzi biznesmen məmurların süni qiymət aıtımına yol verməsi Siyəzəni ayağa qaldırmışdı. Bu proses böyüyə bilərdi və nəzarətdən çıxmaq təhlükəsi yaranardı.
Ona görə bəzi həbslər və qiymətlərin tənzimlənməsi siyasəti növbəti də şimal zonasını içindən qarışdırmaq niyyətində olan qüvvələrin ssenarini pozdu. Bu xronoloji xatırlatmaları diqqətə çatdırmaqda məqsəd budur ki, şimal bölgəsi yenidən qaynayır.
İndi də Siyəzəni Şabrandan bu rayona yeni transfer edilmiş qocaman icra başçısı, əslən lerikli olan Novruz Novruzlu gərginləşdirir. Maraqlıdır ki, cənublu məmur şimalda narazılıq ocağı yaradır, prezidentin apardığı sosial islahatlar ərəfəsində camaatı qızışdırır, ayağa qalxmağa sövq edir.
Reportyor.info-nun əməkdaşlarının verdiyi məlumata görə, səbəb Siyəzənin Tofiq İsmayılov küçəsində yaşayan ailələri yurd-yuvasından didərgin salıb, evlərini başına uçurub, yerində inşa aparmaqdır.
Bir cənublu sabiq başçısı Rauf Həbibovun Qubanı qarışdırıb, hakimiyyətin başına oyun açması azmış kimi, indi də digər cənublu icra başçısı Novruz Novruzlu Siyəzəndə aranı qatmaqda, əhalini narazı salmaqdadır.
Belə ki, Tofiq İsmayılov küçəsi, korpus- 12,13,17, 18, 21 və 22-də yaşayan sakinlərin evlərini yerlə-yeksan etmək istəyirlər.
Siyəzənin mərkəzində olan əraziyə “Cənub”MTK-nın gözü düşüb. Taleyin ironiyasıdır ki, şirkətin adı da cənubla əlaqəlidir. Belə ehtimallar və iddialar var ki, “Cənub” MTK elə N.Novruzluya yaxın şəxslər tərəfindən idarə olunur.
Şirkət bu yeri gözaltı edib və apreldə Mənzil İstismar Sahəsinin rəisi Xalid Əliyev, bələdiyyə sədri Azər Babayev sakinlərlə söhbətə gəlib. Camaata deyilib ki, şirkət ərazini alır, kvadratetrinə 400-500 manat təzminat verəcək.
Amma şirkət vəd edir ki, ərazini şumlayıb burada tikinti apardıqdan, yeni mənzilləri satdıqdan sonra mülk sahiblərinə kompensasiya ödəyəcək.
Kəsəsi, insanlara kələk gəlirlər, quru söz verirlər və vətəndaşlar aldadılmasından qorxur. Bu azmış kimi, sakinlərə deyilib ki, korpuslarda özbaşına tikililər aparmısınız, təzminatda nəzərə alınmayacaq.
Əslində, dövlət layihəsi və planı olmadığına görə şirkət ərazidəki bütün tikililər üçün kompensasiya ödəməyə məcburdu. Bu evlər dövlət planına düşmədiyi üçün vətəndaşların mülkiyyətini satmamaq və onu mənzil bazarının indiki reallıqlarına uyğun dəyərləndirmək hüququ var.
Çünki ərazini almaq istəyən özəl firmadır, öz kommersiya maraqlarını güdür, dövlət sifarişi deyil. Bu zaman sakinlərə onların tələb etdiyi kompensasiya verilməlidir.
Əks halda mülkiyyət toxunulmazdır və heç bir şirkətin ərazinə buldozer yeridib, məhkəmə qərarı olmadan söküntü aparmaq ixtiyarı yoxdur.
Reportyor.info-nun müxbirlərinə bildirilib ki, sakinləri hədələyirlər. Video müsahibə verən şikayətçilərin sözlərinə görə, onları qane edən məbləğ verilməsə evlərini tərk etməyəcəklər.
Lakin “JEK rəisi Xalid Əliyev və bələdiyyə sədri Azər Babayev onlara hədə-qorxu gəliblər. Deyiblər ki, qanunsuz tikililər və zəbt olunmuş ərazilər söküləcək.
Məsələ ilə bağlı sakinlər icra başçısının qəbuluna gediblər. Novruz Novruzov deyib ki, məsələdən xəbəri yoxdur, amma narahat olmayan, kimsə evinizə toxuna bilməz.
Üç gün sonra evlərə bildiriş gəlib ki, artıq tikililəri sökün. Əks halda 118.1.1 maddəsinə görə 10 min manat cərimə olunacaq yaxud həbs ediləcəksiniz.
Bu da bəs eləməyib, FHN nümayəndəsi əraziyə gələrək yaşayışın təhlükəli olduğunu, yanğın və s. əsassız iddialar irəli sürüb. Guya binalar qəzalıdır.
Sakinlər bildirirlər ki, illərdir uçuq-sökük evlərdəyaşayıb, dövlətdən yardım almayıb, öz xərcləri ilə kanalizasiya düzəldib, şərait qurublar, indisə məmurlar və bir şirkət ortalığa düşüb, vətəndaşları dövlətdən incik salır.
Maraqlıdır ki, “Cənub MTK” 2006-cı ildən sakinlərdən pul yığıb, onları bir il ərzində mənzillə təmin edəcəyinə dair müqavilə imzalayıb. Bu müqavilədəki öhdəliyə hələ də əməl etməyib.
Yeri gəlmişkən, şirkətin Bakının Yeni Yasamal yaşayış massivi, Bünyadzadə küçəsi, 60 ünvanında ev alan sakinləriindiyə qədər halal mənzillərinə sahib çıxa bilməyiblər.
Siyəzəndəki evlərdə isə 24 ailədir, içərisində Qarabağ veteranı da var, xəstəsi də, qocası da, şikəsti də… Amma kasıb adamlardan Siyəzən icra başçısı və “Cənub” MTK nə istəyir, bilmək olmur.
Ən azı qanuni şəkildə kompensasiyalar ödənməli, insanlar kirayələrə yerləşdirilməli, sonra evlər sökülməlidir. Amma şirkət bələdiyyə sədri və “JEK” rəisinin vasitəsi ilə təzyiq yolu seçib, əlavə tikililəri hesaba almır.
REPORTYOR.info
Discussion about this post