“Lənkəran, Lerik və Astaranın əksər məktəblərinin siniflərində bir nəfər də olsun qız yoxdur. Bu heç də yaxşı hal deyil. Cənab nazir siz bu məsələyə necə baxırsınız?”.
Bunu Bakıda keçirilən “Azərbaycanda İnsan Kapitalı üzrə Forum”un panellərində müzakirələr zamanı İsveçrənin Cənubi Qafqaz üzrə Əməkdaşlıq Ofisinin regional direktor müavini Simona HaberliAzərbaycan təhsil naziri Ceyhun Bayramovdan soruşub.
Nazir isə öz növbəsində bildirib ki, Təhsil Nazirliyi bu məsələ ilə yaxından maraqlanır: “Bu bizi ağrıdan məsələlərdəndir. Müxtəlif regionlarda mənzərə fərqlidir. Bəzi yerlərdə təhsilin səviyyəsi və keyfiyyəti şəhər məktəblərinə yaxındır. Dediyiniz regionlarda isə vəziyyət fərqlidir. Bunun üçün biz icmalarla işləyirik. Biz həm də məktəbəqədər təhsilə də xüsusi əhəmiyyət veririk. Artıq bir müddətdir valideynlərlə işləməyə üstünlük veririk. Görürük ki, bu üsul daha effektivdir. 2019-cu ildən bu daha da genişləndirəcəyik”.
Tədbirdə iştirak edən Dövlət İmtahan Mərkəzinin (DİM) sədri Məleykə Abbaszadə də məsələyə mövqeyini bildirib: “Biz 26 ildir həm qızlar, həm də oğlanların bilik səviyyəsini yoxlayırıq. Görünən odur ki, bu regionlarda bəzi problemlər var. Regionlarda valideynlər 9-cu sinifdən qız uşaqlarını məktəbə qoymur. Biz müşahidə etmişik ki, əvvəllər bu uşaqların arasında yaxşı qiymər alanlar da var idi. Amma indi belə deyil. Valideyin düşünür ki, əgər uşaq bu vaxta qədər 2-3 qiyməti alıbsa onda ona daha məktəb lazım deyil. Amma elə regionlar var ki, orada qızların sayı çoxdur, oğlanlar azdır”.
Report
Discussion about this post