Rusiyanın başkəndi Moskvada mənzillənib Azərbaycanın hakim elitasına hədyanlar, təhqirlər yağdıran Elvin İsayevin məhkəmə qərarı ilə sərbəst buraxılması, Bakıya deportasiya olunmaması xəbər lentlərində dolaşarkən, başqa bir elan xarakterli informasiya bərq vururdu: YAP siyasi partiyaları görüşə çağırır…
Reportyor.info xəbər verir ki, bu gün saat 11:00-da “Park INN” otelində toplaşacaq Azərbaycan hakimiyyəti və müxalifətinin ana müzakirəsi xarici təhdidlər, müdaxilələr, onlara qarşı mübarizədir.
Hakim partiyanın siyasi rəqiblərini dəyirmi masa ətrafında toplaması, həyəcan təbili çalması bu günün işi deyil.
Nə E.İsayevin azad buraxılması, nə Avropadakı müxaliflərin hazırkı fəallığı iqtidar-müxalifət dialoquna xüsusi zərurət yaradıb.
Hakimiyyəti müxalifətlə danışıqlara, birgə platformadan çıxışa vadar edən prosesin dərinləşməsi, nəzarətdən çıxması, eyni zamanda düşmənini və dostunu müəyyən eləməkdir.
Əldə etdiyimiz məlumatlara görə, 50-dən çox ictimai-siyasi fəalın, partiya sədrlərinin, siyasətçilərin, politoloqların, media nümayəndələrinin iştirak edəcəyi dəyirmi masanın başında Baş nazirin müavini, YAP icra katibi Əli Əhmədov olacaq.
İqtidar bütün siyasi qüvvələrə, ən qatı siyasi düşmənlərinə də dəvət göndərib və parlament seçkisi ərəfəsində ona “bir köynək yaxın” rəqiblərini aydınlaşdırmağa hazırlaşır.
Lakin gələn xəbərlərə görə, AXCP, Müsavat, KXCP kimi siyasi partiyalar dialoqdan imtina ediblər.
REAL Partiyası, AĞ Partiya, ADP və digər siyasi qurumların görüşdə iştirak edəcəyi dəqiqləşməyib. Eyni zamanda parlamentdəki konstruktiv müxalif təşkilatların sədrləri də iştirak edəcəklər.
Tədbirin sonunda birgə bəyanat imzalanacağı, xaricdə yerləşən, hökumətin “söyüş makinası” adlandırdığı qüvvələrə milli təhlükəsizliyə ziddi fəaliyyətə son qoymağa çağırış olacağıxəbər verilir.
YAP-ın siyasi təşkilatları bir araya yığacağı bir ay qabaqdan məlum imiş. Avropada sığınacaq almış, təşkilatlanmış və son illərdə iqtidara qarşı ən güclü cəbhə açmış, hibrid savaşı elan etmiş, Qərb ölkələrinin ayrı-ayrı şəhərlərində propoqanda aparmış, müxtəlif aksiyalar keçirmiş, qırmız xətləri aşmış bəzi qrupların fəaliyyəti Azərbaycan hakimiyyətini narahat etməyə bilməzdi. Bu gedişat daxili, ənənəvi, klassik müxalifətin də zəifləməsinə gətirib çıxarmışdı, milli təhlükəsizliklə bağlı həyəcan doğurmağa başlamışdı.
Hətta idarəolunmaz, fors-major vəziyyət yaranması, qisasçılıq təbliğatını şüar eləmiş qrupların çağırışlarının daxildə reallaşması təhlükəsi istisna edilmirdi.
Bu mənada iqtidarla müxalifətin dialoquna, vahid mövqedən çıxışına ciddi şəkildə zərurət yaranmışdı. Hakimiyyət etiraf edir ki, onları susdura, dayandıra bilmir, sosial şəbəkələrdə “zərərsizləşdirmək” imkanları məhduddur və müxalifətlə müzakirələrə ehtiyacı var. Bu səhər veriləcək açıqlamalar müxalif partiyaların da sonrakı işinə təsir edə bilər.
Əslində, neçə gündür ki deputat Qüdrət Həsənquliyevin emosional çıxışları, iqtidara səslənişi, islahatların gecikdiyini söyləməsi, təxribatların ola biləcəyini bəyan eləməsi, “payız inqilabı” ehtimalları, ardınca YAP-çı deputat Siyavuş Novruzovun bəzi sabiq nazirlərin Avropadakı müxalifətçilərə sponsorluq etdiklərini açıqlaması, Fəzail Ağamalının sözləri bugünkü dəyirmi masanın olacağına bir başlanğıc idi.
Hakimiyyət içində ciddi narahatlıq var, iqtidar yetkililəri və deputatlar açıq danışırlar, təhlükənin yaxınlıqda olduğuna işarə verirlər. Görünür ki, təhlilçilər də lazımi tövsiyyələr verməkdədirlər.
Reallıq budur ki, sosial şəbəkələrdə olan minlərlə insan həmin xaricdəki fəalların klassik müxalifətdən fərqlənən leksikonda danışıqlarına maraqla baxırlar.
Habelə, onlara maliyyə ayıran sabiq nazirlər barəsində cinayət işi başlanması təklifi səsləndirən deputatlar var.
Bir sözlə, gərginlik hiss olunur və bu gün iqtidarla müxalifət səhər saatlarında Bakının mərkəzində toplanaraq ictimaiyyətə yetərincə ciddi ismarışlar verəcəklər.
Gündəmin ən son xəbərləri, şərhləri və reaksiyaları ilə qarşınıza gələn bizi izləməyi qaçırmayın…
REPORTYOR.info
Gülay
Discussion about this post