Nazim Hikmətin bir misrası var: “Mən bir ceviz (qoz) ağacıyam Gülhanə parkında, nə sən bunun fərqindəsən, nə də polis fərqində”.
Şairin bu şeirinin tarixçəsini bilənlər bilir, bilməyənlər üçün qısa izah edək ki, axtarışda olduğu günlərdə sevgilisi ilə görüş üçün Gülhanə parkındakı qoz ağacının altını seçir.
Sevdiyi qız Pirayə parka gələndə hər yan polislə dolu olur, Nazim Hikmət məcbur qalaraq qoz ağacının başında gizlənir. Və elə yerindəcə bu məşhur misraları yazır.
İndi Bakının parkları da Gülhanə kimi bütün şəhər sakinlərinin üzünə bağlıdır. Fərq budur ki, Azərbaycanda insanların sağlamlığını düşünərək bu addımı atıblar.
Koronavirus pandemiyası ucbatından şəhərdəki bütün parklar, Bakı bulvarı, Fəvvarələr meydanı gəzinti üçün tam qapadılıb. Parkların girişlərinə dəmir hasarlar çəkilib. Hazırda Nərimanov, Atatürk, Yasamal və digər parklar bağlanıb.
Parklara yalnız səhər saatlarında süpürgəçilər daxil olurlar, ərazini təmizləyib çıxırlar. Onsuz da insanlar özləri xüsusi karantin rejimi elan olunduğunu, parkların qadağan edildiyini yaxşı başa düşürlər.
Odur ki, şəhərdə vacib işləri ilə əlaqədar hərəkət edənləri, metro və avtobuslarda sərnişinləri, sürücüləri görmək olur. Yəni heç kəs “yaxşı bahar havasıdır” deyə Bakı küçələrində qayğısız gəzişmir.
Eyni zamanda post-patrul xidməti maşınları, Daxili Qoşunların əsgərləri Bakı küçələrində dolaşırlar.
Ümumilikdə, Bakı bomboş, səssiz-səmirsiz, sakit və hüznlüdür. Daha iki ay qabaqkı qaynayan, tıxacların çəngində olan, adamlarla dolu paytaxt görə bilməzsiniz.
Parklarla bərabər kafe – restoranların, dönərxanaların, ticarət və əyləncə mərkəzlərinin bağlıdır. Əvvəlki günlərlə müqayisədə indi valideynlərin uşaqları ilə şəhərə çıxmasına da az rast gəlinir.
Lakin fəaliyyətinə rəsmi icazə verilən avtoyuma, yanacaqdoldurma məntəqələri, maşınların ehtiyat hissələri satılan dükanlar və s. obyektlər açıqdırlar. Onlar da müştəri həsrətində…
Bir sözlə, Bakıda həyat dayanıb, əhalinin böyük əksəriyyəti “evdə qal” tövsiyəsində əməl etməkdədir…
