“Azərişıq” ASC “Merkaba-Soft” MMC ilə maliyyə dəyəri 2 milyon 65 min manat olan müqavilə imzalayıb. Reportyor.info xəbər verir ki, müqavilədə mobil tətbiqi dəstəkləyən kart oxuyucuların satınalınması nəzərdə tutulur.
İqtisadiyyat Nazirliyi yanında Dövlət Vergi Xidmətinin reyestr məlumatlarına göstərilir ki, “Merkaba-Soft” MMC 21 iyun 2019-cu il tarixində qeydiyyata alınıb. Nizamnamə kapitalı 300 manat olan şirkətin hüquqi ünvanı Bakı şəhəri Nəsimi rayonu, Nizami, ev 119, mənzil 8-də yerləşir. Şirkətin qanuni təmsilçisi Yüzasif Qara oğlu Kərimovdur.
“Merkaba-Soft” MMC-nin fəaliyyəti barədə açıq mənbələrdə hər hansı məlumat yoxdur. Bir ildən artıqdır fəaliyyət göstərməsinə baxmayaraq dövlət satınalaçlarında iştirakı barədə də məlumatlara rast gəlinmir.
MMC-nin qanuni təmsilçisinə gəlincə, bu şəxs Azərbaycan ictimaiyyətinə kifayət qədər yaxşı tanışdır.
Yüzasif Kərimov Respublika Klinik Xəstəxanasının baş həkimi olub. Görünür, baş həkim vəzifəsindən uzaqlaşdırılandan sonra biznes fəaliyyətinə başlayıb. Bununla belə, o həm də Səhiyyə Nazirliyinin Rəyasət Heyətinin üzvüdür.
Yüzasif Kərimov 4 il əvvəl oğlu Rəhim Kərimovun törətdiyi qəza ilə gündəmə gəlib.
2016-cı il may ayının 11-də Rəhim Kərimov Diplomatiya Akademiyasının (ADA) tələbəsi Rüfət Allahverdiyevin ölümünə səbəb olan yol qəzası törədib. Hadisə saat 03:00 radələrində Nəsimi rayonu, Bülbül prospektində baş verib. «Mercedes» markalı avtomobil piyada Rüfət Allahverdiyevi vurub. Yaralı xəstəxanaya çatdırılsa da, onun həyatını xilas etmək mümkün olmayıb. Rüfət Allahverdiyev mayın 12-də orada dünyasını dəyişib. O, hakim Elbəyi Allahverdiyevin oğlu olub.
Discussion about this post