“Azqranata”nın daha bir rəhbəri istefa verdi

Reportyor.info Fed.az-a istinadən xəbər verir ki, ölkənin tanınmış marketinq mütəxəssislərindən biri olan Rafiq Hunaltay bu şirkətlərdəki CEO müavini postunu tərk edib.

Bu barədə o özü məlumat verib: «Nəhayət, 2 illik marafonun sonuna gəldik. 2 il öncə Modern Groupda Biznesin İnkişafı Direktoru olaraq işə başlayıb, daha sonra «Azgranata» Satış və Dağıtım Şirkətinin rəhbəri, «Azgranata» İdarə Heyətinin üzvü kimi fəaliyyət göstərdim. İşdən çıxmağın müsbət tərəfləri çoxdur, amma ən xoşuma gələni çıxanda öyrəndiyin hər şeyi özünlə aparmağındır. Karyera yaddaşımda istər Modern Group, istərsə də Azgranata mənim üçün həm böyük etimadın göstərildiyi, həm də özümə müsbət mənada çox şey qatdığım bir yer olaraq qalacaq. Eyni zamanda şirkət üçün də bilik və bacarıqlarımı maksimum istifadə etdiyimə inanıram. İş həyatımda fürsətdən ancaq aid olduğum yerə, şəxslərə, həmkarlarıma faydalı olmaq üçün istifadə etmişəm. Ona görə də fürsətdən istifadə edib bu 2 il ərzində sıx çalışdığım hər kəsə təşəkkür edirəm»-deyə R.Hunaltay bildirib.

Qeyd edək ki, bu son 1 ayda «Modern Qrup» və «Azqranata»da baş verən ikinci istefadır. İyunu əvvəlində «Azgranata» şirkətinin baş direktoru Anar Bayramov da istehfa verib. «Çox fikirləşdikdən sonra “Azgranata”dan ayrılmaq qərarına gəldim. Artıq qərarımı elan etmişəm, ayın sonuna kimi işləri təhvil verəcəyəm.

8 ildir karyeram əsasən (kiçik ara ilə) “Azgranata” və “Modern Group” ilə bağlı oldu. Hər zaman təsisçilərin etimadını gördüm, əlimdən gələni etdim ki, etimadı doğruldum komandamızla birlikdə. Allaha şükürlər olsun ki, alnımız açıqdır. Gələcək planlarımla bağlı bildirim ki, mənim işim biznes idarəçiliyidir»-deyə A.Bayramov bildirmişdi.

R.Hunaltay da A.Bayramovun komandasına daxil olaraq «Azqranata»nın rəhbərliyinə gətirilən mütəxəssislərdən idi.