Azərbaycanın Rusiyadakı səfirliyi Pyatiqorsk şəhərində keçirilmiş “Maşuk-2019”Şimali Qafqaz Gənclər Forumunda baş vermiş hadisə ilə əlaqədar Rusiya Xarici İşlər Nazirliyinə nota verib.
“Avqustun 9-da Pyatiqork şəhərində keçirilmiş “Maşuk-2019” Şimali Qafqaz Gənclər Forumu çərçivəsində Ermənistanın Rusiyadakı səfiri tədbir iştirakçıları ilə keçirilən görüşü zamanı Azərbaycana, ölkəmizin suverenliyinə və ərazi bütövlüyünə qarşı yolverilməz fikirlər səsləndirib ki, bu da forumda iştirak edən “Gənclərin Bakı klubu” İctimai Birliyinin sədri Sabir Rüstəmovun haqlı etirazına səbəb olub və xoşagəlməz insident baş verib”, – deyə səfirliyin məlumatında bildirilir.
Sabir Rüstəmov bununla bağlı səfirliyə müraciət ünvanlayaraq hadisənin mahiyyətini açıqlayıb və səfirlikdən dəstək istəyib.
“Məsələnin ciddiliyini, Azərbaycan ictimaiyyətində doğurduğu əks-sədanı nəzərə alaraq, səfirlik Rusiya Xarici İşlər Nazirliyinə rəsmi nota göndərib. Bundan əlavə, səfir Polad Bülbüloğlu, daha əvvəl əldə olunmuş razılığa baxmayaraq, Pyatiqorsk şəhərinə səfərdən, yuxarıda qeyd olunan Forumda iştirakdan və planlaşdırılmış görüşlərdən imtina edib”, – deyə məlumatda vurğulanır.
