Azərbaycan “Ideas for action 2018”-də təmsil olundu

ABŞ-ın “Wharton” universiteti və Dünya bankı (The World Bank) tərəfindən təşkil olunan “Ideas for action 2018” müsabiqəsində qalib layihələrin adları açıqlandı.

İnsider.az bildirir ki, müsabiqənin nəticələrinə əsasən, birinci yerə “MİNO Microbubble Technology” (İndoneziya) layiq görülüb. İkinci və üçüncü pillələrdə isə müvafiq olaraq “Starlight” (Ruanda) və “Amal” (ABŞ) qərarlaşıb.

AZƏRBAYCAN “IDEAS FOR ACTİON 2018”-DƏ

Qeyd etmək istərdik ki, “Ideas for action 2018” müsabiqəsində  Azərbaycanı təmsil edən “Broox” layihəsi də təqdim olunub. Urxan Seyidov tərəfindən təsis olunmuş layihə sosial biznes yönümlüdür. Layihənin əsas məqsədi imkansız tələbə və məktəblilərə təhsil almağa kömək etməkdir.

QALİB LAYİHƏLƏR

“MİNO Microbubble Technology” – balıq təsərrüfatını inkişaf etdirmək üçün suda həll edilmiş oksigenin miqdarını artıran texnologiya təklif edir. Layihəyə əsasən, “MİNO Microbuble Technology” suda həll edilmiş oksigenin miqdarını 7 ppm-ə çatdırır. Layihə iştirakçıları bu  texnologiyanın  mövcud aerator texnologiya ilə müqayisədə balıq təsərrüfatının məhsuldarlığını 40%-dək artırdığını sübut etməyə müvəffəq olublar.

“Starlight” – enerjiyə davamlı girişi təmin etmək üçün qadınların rəhbərlik etdiyi biznes modeli təklif edir.
Sub-Saxara ölkələrində elektrifikasiya dərəcəsi  aşağıdır və kerosin lampasından istifadə insanların sağlamlığı, ətraf mühit üçün zərərlidir. “Starligt”ın ideyası Ruanda və qonşu ölkələrdə  bütün kerosin lampalarını günəş enerjisi ilə işləyən fənərlərlə dəyişməkdir. Onlar yerli  qadınları təmiz-enerji mikrosahibkarlarına çevirmək üçün işə qəbul, təlim və dəstək verən sistem təklif edirlər.

“Amal” –  yeni leqal “software” proqramı və Yaxın Şərqdə, eləcə də Şimali Afrikada qadınlara hansı hüquqların olduğunu başa düşməyə imkan verən rəqəmsal platforma  və bu hüquqlara təhlükəsiz girişi təmin edən sənədləşmə təklif edir. “Amal” mərkəzləşdirilmiş, avtomatlaşdırılmış sənədləşdirmə proqramı vasitəsi ilə bu hüquqları təmin etmək üçün resurslar təklif edir.

Xatırladaq ki, bu il “Ideas for action” müsabiqəsində iştirak etmək üçün 2100 müraciət daxil olmuşdu.

“Ideas for Action” dayanıqlı inkişafın maliyyə məsələlərində maraqlı olan  gənclər üçün “Wharton” universiteti və Dünya bankı (The World Bank) tərəfindən təşkil olunur. Bütün dünya üzrə tələbə və gənc mütəxəssislər Dayanıqlı İnkişafın Məqsədlərinin maliyyələşdirilməsi və həyata keçirilməsi üçün ideyaların yaradılmasında iştirak edirlər. Müsabiqənin qalibləri Beynəlxalq valyuta fondunun və Dünya bankının illik görüşlərində öz ideyalarını təqdim edirlər və  “Wharton” universitetinin startaplarının akseleratorunun dəstəyini əldə edirlər.