Azərbaycan filmi beynəlxalq festivalda qələbə qazanıb

Rusiyanın Kazan şəhərində “ZILANT” beynəlxalq kinofestivalı keçirilib. Gununsesi.info-nun xəbərinə görə, festivalda Rusiya, Fransa, İspaniya filmləri iştirak edib. Festivalın finalçıları arasında azərbaycanlı rejissor Murad Əbiyevin “Dəniz suyu içən it” filmi də var. Belə ki, bu film “Qısametrajlı film” kateqoriyasında seçilmiş və “Ən yaxşı rejissor işi” nominasiyasında qalib olub.

Festival çərçivəsində iştirakçıların müsiflər heyətinin sədri ilə tanışlığı baş tutub. Teatr və kino aktyoru, Rusiyanın əməkdar artisti Vladimir Demidovla tanışlıq olmuş, eyni zamanda Nuriman Minikayevin “Kinokadrın kompozisiyası” master-klası keçirilmiş və finalçıların işlərinə baxış keçirilib. Qalibləri Rusiyanın aparıcı kinorejissoru Andrey Selivanov mükafatlandırıb. Azərbaycan filmi, ssenari müəllifi və prodüsser Lalə Əliyeva-Klıçkova tərəfindən təqdim edilmişdir. O, filmin yaradılma tarixindən danışaraq, Azərbaycan filmini beynəlxalq festivalda təqdim etməkdən qurur hissi duyduğunu qeyd edib.

Qeyd edək ki, “Dəniz suyu içən it” qısametrajlı filmi “NərimanFilm” kinostudiyasının bazası əsasında çəkilib. Film, sevdiyi kişinin xəyanətinə məruz qalan və doğulmamış övladını itirən qadının taleyindən bəhs edir. Ruh düşkünlüyü və çarəsizlik yaşayan qadın kimsəsiz çimərliyə gəlir və bu yer onun həyat tarixçəsinin aydınlaşmasının səssiz şahidinə çevrilir.

Xatırladaq ki, film Calcutta International Cult Film Festival, International Bosphorus Film Festival (Türkiyə), Sankt-Peterburqda “Green Vision”, HADİSƏ – 2017 və Sankt-Peterburqdakı “Green Vision” festivallarında qeydə alınıb, həmçinin ABŞ-ın Malibu şəhərində qapalı nümayişi həyata keçirilmişdir. Bu ilin aprel ayında isə film Kamerunda beynəlxalq festivalda təqdim ediləcəkdir. Baş rolun ifaçısı Natavan Hacıyeva “Women’s Only Entertainment Film Festival”da “Xarici kino sənətinin ən yaxşı aktrisası” adına, filmin prodüsseri isə Moskvadakı Moscow Indie Film Festival müstəqil kino festivalında “Ən yaxşı qadın kinomatoqraf” mükafatına layiq görülüb.

Gülnaz Qənbərli
Gununsesi.info