Ağstafanın təzə başçısına – İttiham

Bir qrup Ağstafa sakinin MilliYol-a ünvanladıqları şikayət məktubunda bir neçə ay əvvəl bu rayona başçı təyin olunan Nizaməddin Quliyevin fəaliyyətindən ciddi narazılıqlarını ifadə ediblər.

Sakinlər bildirir ki, Nizaməddin Quliyev Ağstafaya gələn gündən ucuz və çox keyfiyyətsiz dekorativ işlər görməklə məşğul olur və gözdən pərdə asır. Əslində isə Ağstafa şəhəri baxımsızlıqdan xarabaya çevrilir. Xüsusən şəhərin mərkəzi küçəsindən kənara çıxdığı zaman insanlar hara düşdüklərini anlaya bilmirlər.

Son zamanlar isə Ağstafanın parkları da baxımsızlıqdan məhv olmaqdadır. Misal üçün şikayətçilər bildirirlər ki, rayona gələn qonaqların ən çox maraqla getdiyi yerlərdən biri olan və açılışında prezident İlham Əliyevin iştirak etdiyi “Tarixi abidələr” parkı baxımsızlıqdan dağılıb gedir.

Maraqlıdır ki, Nizaməddin Quliyev bu parkdakı gül kollarını və işıq dirəklərin sökərək “Bayraq” meydanında və şəhərin digər mərkəzi yerlərində yerləşdirib.

İcra baçısı həmin işıq dirəklərini yenidən rənglətdirib və bununla da yeni işıq dirəkləri aldığını göstərməyə çalışır. Təbii ki, “Bayraq” meydanına və şəhərin mərkəzi küçəsinin işıqlandırılması üçün ayrılan vəsaitlər də mənimsənilib.

Şikayət məktubunda qeyd olunur ki, Nizaməddin Quliyev özündən əvvəlki icra başçısının gördüyü işləri sökür və elə həmin avadanlıqları yenidən rəngləyərək harasa qoymaqla rayonda abadlıq işləri aparırlar.

Ağstafa sakinləri bu baş verənləri dözülməz hal kimi dəyərləndirirlər. Hətta icra başçısının “abadlıq siyasətinin” mühüm bir hissəsi şəhərdəki ağacların gözvdələrini rəngləməkdən ibarətdir. Bununla isə ağaclara ciddi ziyan vurulur və ağclar quruyurlar.

Nizaməddin Quliyevin bu yolla nəyə can atması isə vəlli deyil. Ağstafalılar hesab edirlər ki, bununla Nizaməddin Quliyev sadəcə gözdən pərdə asdmağa çalışır. Bu zaman isə təbiətə və Ağstafa şəhərinin ekololi durumuna vurdyğu ziyanın fərqinə heç varmır.

Qarşı tərəfin mövqeyini dərc etməyə hazırırq…