«AzPolitika.info»-nun Türkiyə KİV-nə istinadla verdiyi xəbərə görə, qardaş ölkənin lideri Rəcəb Tayyib Ərdoğan bəyan edib ki, Amerika Birləşmiş Ştatları (ABŞ) Türkiyə ilə şantaj və təhdid dili ilə danışır, ancaq ölkəsi kifayət qədər güclüdür və təhdidlərə uymur.
Son vaxtlar Vaşinqtonla Ankara arasında münasibətlər gərginləşib, o cümlədən, amerikalı pastor Endyü Branson işinə görə. Branson 2016-cı ildə Türkiyə hakimiyyəti tərəfindən saxlanıb. ABŞ-ın ədliyyə nazirliyi Türkiyənin ədliyyə naziri Əbdülhəmit Gül və daxili işlər naziri Süleyman Soyluya qarşı sanksiya tətbiq edib və onları «insan haqlarını ciddi şəkildə pozmaqa» günahlandırıb.
Ardınca, prezident Tramp Türkiyədən polad və alüminium idxalına olan rüsumları uyğun olaraq 20 və 50 faizə qədər artırdığını bəyan edib. Bu, türk lirəsinin kəskin ucuzlaşmasına çəbəb olub. Buna cavab olaraq, Ankara 22 adda ABŞ məhsuluna, o cümlədən, tütün, alkoqol, avtomobil, kosmetik məhsullara, düyü və meyvələrə 533 milyon dollarlıq idxal rüsumu tətbiq edib.
«ABŞ mövcud siyasi problemlərin həlli üçün danışıqlar yolunu yox, yanlış olaraq şantaj və təhdid yolunu tutub. Ancaq, bizim iqtisadiyyatımız təhdidlərə uymamaq üçün kifayət qədər güclüdür. Bizi o narahat edir ki, ABŞ-ın indiki rəhbərliyi heç bir məntiqə sığmadan, strateji balansı hesaba almadan, bizim ölkəmizi hədəf olaraq seçib. ABŞ bizim Suriyadakı həssaslığımızla hesablaşmır və terrorçu təşkilatlarla (terrorçu kürd gücləri ilə) əməkdaşlığı davam etdirir. ABŞ-ın bu neqativ yanaşması həm də iqtisadi müstəviyə keçir» – deyə, Ərdoğan Türkiyə paprlamentinin deputatları qarşısındakı çıxışında bildirib.
O, Branson işini bir bəhanə adlandırıb.
Discussion about this post