Ərdoğan Yerevanda həbsdə olan Azərbaycan əsilli yeniyetməyə görə Paşinyana zəng etdi

15 Sentyabr 2018 - 13:01
65 oxunma

Türkiyənin Qars bölgəsində heyvan otararkən sərhədi pozaraq, Ermənistan tərəfə keçən və 45 gündür bu ölkədə həbsdə qalan Umut Ali Özmənə görə Türkiyə prezidenti Rəcəb Tayyib Ərdoğan Ermənistan baş naziri Nikol Paşinyana zəng edib.

Türkiyə KİV-i xəbər verir ki, Ərdoğan telefon danışığında Umut Alinin ekstradisiyasını istəyib.

Paşinyan Ərdoğanın istəyinə müsbət cavab verib. Umut Ali sentyabrın 17-si və ya 18-i Türkiyəyə təhvil veriləcək.

*   *   *08:58

Bu il iyul ayının 24-də Qars vilayətinin Akyaka qəsəbəsində azaraq Ermənistan sərhədini keçən və Rusiya sərhədçiləri tərəfindən tutulub ermənilərə təhvil verilən 16 yaşlı Umut Ali Özmen Yerevan həbsxanasında döyülüb. Virtualaz.org Türkiyə mənbələrinə istinadən xəbər verir ki, bu haqda yeniyetmənin atası Mustafa Özmen deyib.

Qars valisi Rahmi Doğanın bildirdiyinə görə yeniyetmənin geri qaytarılması üçün İnterpol üzərindən danışıqlar gedir. İnterpolun Türkiyə bürosu bu həftənin əvvəlində Ermənistan İnterpolu ilə təmas qurub, gözlənilir ki, gələn həftənin əvvəllərində Umut buraxılacaq və Türkiyəyə qaytarılacaq.

Yeniyetmənin atası Mustafa Özmen isə bildirib ki, peşə məktəbinin ikinci sinfində təhsil alan oğlu Kiçik Durduran kəndinin yaylağında heyvan otararkən qarşıdakı təpənin arxasında nə olduğu ilə maraqlanıb. Bu vaxt bilmədən Ermənistan sərhədini keçib. Həmin vaxt yaxınlıqda taxıl biçən erməni bu haqda sərhədçilərə xəbər verib. Rusiya əsgərləri gəlib və yeniyetmə qorxaraq uzaqlaşıb, daha sonra əsgərlərə təslim olub. Onu Yerevanda həbsxanaya salıblar.

Vali Doğan deyib ki, gəncin Ermənistana keçməsindən xəbər tutan kimi bu ölkənin rəsmi məqamları ilə əlaqə saxlayıblar. Erməni tərəfi isə məsələnin diplomatik yolla həll olunacağını deyiblər. Bildiriblər ki, məsələnin “başqa tərəfləri də var”. Nəticədə Türkiyə XİN-ə və Daxili İşlər Nazirliyinə müraciət edilib. İşə İnterpolun Türkiyə bürosu qoşulub.

“Sərhədi icazəsiz keçmə faktı var, amma sonda söhbət 18 yaşından kiçik birindən gedir. Normal halda biz bu cür icazəsiz sərhəd keçişlərini iki ölkə rəsmi məqamları arasında görüşmələrlə həll edə bilirdik. Amma bu dəfə Ermənistan məsələnin diplomatik yolla həllini tələb edib”-vali deyib.

Mustafa Özmenin bildirdiyinə görə, o Yerevana gedərək oğlu ilə həbsxanada görüşüb. O deyib ki, Azərbaycan əsilli olduqları üçün ermənilər oğlunun “casus olmasından” şübhələnir.

“Mən oğlumla görüşənə qədər sağlıq durumu normal idi. Amma mən qayıtdıqdan sonra uşağı iki dəfə döyüblər, yumruqla, təpiklə vurublar. Ankarada olduğum üçün qayıda bilmədim, amma indi dövlətimizdən yardım istəyirəm”-Mustafa Özmen bildirib.

Reportyor.info

Reportyor.info saytının redaksiyası ilə əlaqə:Telefon - 0553490491, Email - [email protected]



Baş redaktor: Arifə Əliyeva

Reportyor.info saytının redaksiyası ilə əlaqə:
Telefon; +994553490491,
email - [email protected]

Giriş | Hazırladı "Qurdqanlı Design"